Қарағанды облысының Осакаров ауданына қарасты Родниковское ауылында заманауи сүт фермасы салынып жатыр . Мұнда жылына 70 мың тонна сүт өндіріледі. Бұл құны 30 миллиард теңгеден асатын өңірдегі ірі инвестициялық жобалардың бірі. Ферманы биыл жыл соңына дейін іске қосу жоспарланып отыр.

Фермада келешекте 6 мың сауын сиыр ұсталады. Ол үшін жеке жемшөп қоры дайындалады. Бүгінгі таңда 1 мың гектар жерге жүгері мен жоңышқа егілген. Ауқымды ауылшаруашылық кешені өңірдегі сүт өңдеу кәсіпорындарын шикізатпен қамтамассыз етеді. Сөйтіп, импортқа тәуелділікті азайтады.

Иван Георгиади, «Евразия Инвест LTD» ЖШС құрылтайшысы:

- Бізге өнімділікті арттыру үшін бірінші кезекте мол жемшөп қоры қажет. Биылғы осы маусымда суармалы алқаптарды 4,5 мың гектарға, ал жыл соңына дейін 10 мың гектарға жеткіземіз. Жоба үш жылда кезең-кезеңімен жүзеге асады. Алдымен 1200, сосын 2400, кейін ферма жұмысы жолға қойылған соң 6000 сауын сиыр ұстаймыз.

Фермаға Ресейден голштин-фриз тұқымды сиырлар жеткізіледі. Олардың біреуі күніне 40 литрге дейін сүт береді. Осылайша облыстағы фабрикаларды сүтпен қамтамасыз етіп отырады. Ол үшін фермаға неміс технологиясымен жұмыс істейтін заманауи сауын аппараттары, өзге де қажетті қондырғылар орнатылады.

Ермағанбет Бөлекпаев, Қарағанды облысының әкімі:

- Биыл басқа жақсы бір өндіріс басталады деп отырмыз. Үкімет инвесторға арзандатылған несие беріп көмектесті. Оған біз рақметімізді айтамыз. Инвестор өзі де қолға алып, жұмысты бастап кетті. Осындай жобалар арқылы біз отандық өндірісті көтереміз деп санаймын.

Мұнда келешекте 200 адам жұмысқа қабылданады. Оларға арнайы жатақхана мен асхана салынып жатыр. Ферма жыл соңына дейін іске қосылады.

Авторлары: Руслан Нұрланұлы, Аман Хамит