Қазақстан мен Болгария арасында стратегиялық серіктестіктің жаңа кезеңі басталды. Еуропалық инсвесторлар елімізді Орталық Азия нарығына жол ашатын қақпа ретінде көріп отыр. Сондықтан өндіріс, сауда-саттық, туризм және цифрландыру салаларына инвестиция құюға әзір. Бүгін Астанада қос мемлекеттің бизнес форумы өтіп, бірнеше маңызды құжатқа қол қойылды.

Қазақстан – тоғыз жолдың торабы. Батыс пен шығысты байланыстырып отырған алтын көпір. Еуропа мен Қытай арасында тасымалданатын жүктің 85 пайызы еліміз арқылы өтеді. Экономикасының өсімі жағынан Орталық Азиядағы көшбасшы елмен жан-жақты байланысты нығайтуды көздейтін елдердің қатары артып келеді. Болгария – солардың бірі.

Қасым-Жомарт Тоқаев, Қазақстан Республикасының Президенті:

Президент Радевтің Қазақстанға жасаған ресми сапары стратегиялық серіктестігіміздің жаңа кезеңі басталғанын көрсетеді деді. Біз Болгарияны дос ел әрі өте маңызды стратегиялық серіктес санаймыз. Дегенмен сауда-инвестициялық ынтымақтастықта пайдаланылмаған әлеует жеткілікті. Арадағы байланысты жандандыруда екі елдің экономикалық ықпалдастық жөніндегі үкіметаралық комиссиясы маңызды алаңға айналады деп санаймыз.

Болгариялық инвесторлар Шымкентте ет комбинатын ашады

Қазір еліміз түрлі сала бойынша, әсіресе жасыл энергетика саласында шетелдік инвесторлар үшін тартымды елге айналды. Бүгінде Қазақстанда 150-ден астам қайта жаңартылатын энергия нысаны бар. Одан бөлек агробизнестің әлеуетін арттыруға үлкен көңіл бөлініп отыр. Мәселен, ауыл шаруашылық өнімдеріміз әлемнің 70-тен астам еліне экспортталады. Президент форумда Болгариялық серіктестермен ет пен сүт өнімдерін, бал, өсімдік майын өндіруде ынтымақтастық орнатуға мүдделіміз деді. Сондықтан Lekkerbek компаниясының Шымкентте ет өңдейтін зауыт ашу ұсынысы бірден қолдау тапты.

Мадияр Сұлтанбек, «Kazakh Invest» ҰК» АҚ Басқарма төрағасының орынбасары:

Бүгін Шымкентте ет өңдейтін зауыт салу туралы келісімге келдік. Оның құны 20 млн еуроға жуықтайды. Қазір «Kazakh Іnvest» ұлттық компаниясы мен еуропалық серіктестеріміз инвестиция құюға болатын салаларды іріктеп жатырмыз.

Екіжақты туризмді дамыту көзделіп отыр

Нұрсұлтан Тілектес, тілші:

Қазіргі таңда екі ел арасында энергетика, фармацевтика, агроөнеркәсіптік кешен және технолологиялар саласында серіктестік орнаған. Бірақ алыс-берісті әлі де жетілдіре түсу керек. Әсіресе екіжақты туризм бағытында атқаратын шаруа көп.

Қос мемлекеттің де бұл орайда бір-біріне ұсынары мол. Мәселен, бізде Алматы тау кластері, Щуче-Бурабай және Маңғыстау курорттық аймағын айтпағанда, Болгария ғана емес әлем жұртын тартуға тұрарлық Байқоңырымыз бар.

Әлішер Тұрсын, «Kazakh Tourism» ҰК» АҚ жобаларды сүйемелдеу департаментінің директоры:

Биыл әсіресе Байқоңырға үлкен көңіл бөлініп отыр. Ол – теңдессіз, әлемнің басқа елінде кездеспейтін туристік аймақ. Себебі адамзат баласы ғарышпен байланысын бірінші Байқоңырда бастаған болатын. Сол жерге болгариялық туристердің өздері де арнаулы туроператорлар арқылы бар алады.

Жаңа технологиялар – жаңа мүмкіндіктер

Мемлекет басшысы болгариялық серіктестермен фармацевтика секторында ықпалдастық орнатудың әлеуеті зор деп санайды. Қасым-Жомарт Тоқаев өз сөзінде цифрлық трансформацияға баса назар аударды. Сонымен қатар Қазақстанда мемлекет те, жеке сектор да өз істеріне озық цифрлық шешімдерді кеңінен енгізіп жатқанын айтты.

Қасым-Жомарт Тоқаев, Қазақстан Республикасының Президенті:

Президент мырза, Сіз еліңіздің жасанды интеллектіні игеру және өзінің суперкомпьютерін жасау ісіндегі керемет жетістіктері жөнінде айттыңыз. Аталған табыстарыңыз осы ерекше маңызды салада тәжірибе алмасуға негіз болады. Қазақстанда CryptoCity пилоттық аймағы дайындалу үстінде. Мұнда криптовалютаны күнделікті сауда жасауға, қызметтердің ақысын төлеуге және экономикада кеңінен пайдалануға болады.

Форум соңында Президент Болгария компанияларын Астана халықаралық қаржы орталығына шақырды. Айта кету керек, бүгінде елімізде Болгарияның 60-тан астам компаниясы жұмыс істейді.

Нұрсұлтан Тілектес