ЕуроОдақ Ресейге қарсы 18-ші санкциялар пакетін әзірлеп жатыр. Жаңа экономикалық шектеулер жақын күндері жарияланбақ. Ал іргелес елде эмбарго салдарынан кәсіпорындар жабылып, шаруалар мемлекеттен субсидия талап етуде.

Өткен аптада ЕуроОдақ Ресейге қарсы 17-ші санкциялар пакетін жариялаған еді. Осы жолы өнеркәсіп өндірісі қатты зардап шекті. Бизнес өкілдері, кәсіпорын басшылары өндірістік шығын кем дегенде 200 пайызға жуық өскенін айтады.

Руслан Амиров, кәсіпорын директорының орынбасары:

Импорт алмастыру жағын қарастырып жатырмыз. Бұрын өнімдерімізді Еуропа елдеріне экспорттасақ, қазір тек көрші мемлекеттерге ғана жеткізе аламыз. Өйткені логистика бұзылды. Шығаратын өнімдеріміз азайып, қымбаттады. Бізге ауыр соққы болды.

Үкімет санкцияға ұшыраған кәсіпорындарға субсидия көлемін өсіруді қарастырып жатыр. Алайда сарапшылардың айтуынша, мұнайдың арзандауы, рубльдың құлдырауы және кадр дефицитіне байланысты алдағы айларда 100 мыңға жуық ірі және шағын кәсіпорын жабылуы мүмкін. Бүгінгі күні Ресейге 5 миллионға жуық жұмысшы қажет. Экономикалық шектеулер енгізілген компаниялармен жұмыс істеген кәсіпорындарға да санкция салынды.

Марсель Салихов, сарапшы:

Соңғы үш жылда Ресейге салынған санкция санында шек жоқ, барлық салаға қатысты. Бірақ үшінші елдер арқылы тауар жеткіздік. Ал қазіргі санкциялар экономикаға айтарлықтай кесірін тигізеді.

Жаңа экономикалық санкциялар энергетика саласына негізделмек. Ең алдымен мұнай бағасының шекті деңгейіне қатысты.

Индира Бегайдар, тілші:

Яғни Ресей мұнайының бағасы барреліне 60 доллардан 45 долларға бірақ түсіріледі. Сонымен қатар «Солтүстік ағын» газ құбыры мен қаржы секторына да әсер етеді. Ресей банктерінің 95 пайызы қазірдің өзінде санкция тізіміне ілінген.