Шіркеу әлемдегі ең биік шіркеу мәртебесіне ие болды.
Барселонадағы әйгілі Саграда Фамилия шіркеуінің орталық мұнарасына кресттің алғашқы бөлігі орнатылып, ғимараттың биіктігі 162,91 метрге жетті.
Барселонаның символына айналған Қасиетті Отбасы шіркеуі (Саграда Фамилия) құрылысының маңызды кезеңі аяқталды. Құрылысшылар орталық мұнараға кресттің алғашқы бөлігін орнатқаннан кейін ғимараттың биіктігі 162,91 метрге дейін көтерілді. Бұл көрсеткіш бұрынғы рекорд иесі – Германиядағы Ульм соборынан (161 метр) асып түсті.
Ульм соборы XIV ғасырда басталып, XIX ғасырда аяқталған еді және 1890 жылдан бері әлемдегі ең биік шіркеу ретінде танылып келген.
Антонио Гауди жобалаған Саграда Фамилия шіркеуінің құрылысы 1882 жылы басталған. Келесі жылы жас сәулетші Гауди бұл жобаны өз қолына алып, бастапқы жоспарын түбегейлі өзгерткен. Алғашында шіркеу қарапайым, сенушілердің қайырымдылық қаражатымен салынатын ғибадат үйі ретінде жоспарланған болатын. Алайда Гауди оны өмірінің басты туындысына айналдырды.
Шіркеудің құрылысы бүгінде 140 жылдан астам уақыт бойы жалғасып келеді. Негізгі ғимараттың толық аяқталуы 2026 жылы, яғни Гаудидің қайтыс болғанына жүз жыл толатын жылы жоспарланып отыр.
Алдағы айларда Иса Мәсіхке арналған орталық мұнараға кресттің қалған бөліктері орнатылмақ. Осыдан кейін Саграда Фамилияның жалпы биіктігі 172 метрге жетеді. Бұл көрсеткіш шіркеуді тек Еуропада ғана емес, бүкіл әлемдегі ең биік діни ғимаратқа айналдырады.
Саграда Фамилия бүгінде Барселонаның басты туристік нысаны және ЮНЕСКО-ның дүниежүзілік мұралар тізіміне енген сәулет ескерткіші болып табылады.
