Елордада іскер нәзік жандардың VII форумы өтті, деп хабарлайды 24kz.

Оған еліміздің түкпін-түкпірінен кәсіпкер салада табысқа жеткен 500-ден астам әйел қатысты. Жиында олар өзара тәжірибе алмасып, бизнес әлеміне енді қадам басқан жастарға ақыл-кеңестерімен бөлісті. Сондай-ақ форум шеңберінде «Анамның қолымен жасалған» атты жәрмеңке өтті. Мұнда қолөнер шеберлерінің өнімдері қойылды.

Айта кету керек, бүгінде әйелдердің отандық шағын және орта бизнестегі үлесі 50%-тен асады. Елеулі бөлігі бастапқы капиталды көп қажет етпейтін қызмет көрсету саласында және қарапайым заттар экономикасында кәсібін дөңгелетіп жүр дейді — форумды ұйымдастырушы Жамиля Эрназарова. +

Жамиля Эрназарова, іс-шара ұйымдастырушысы:

- Форумның негізгі мақсаты – кез келген әйелдің кәсіпкер бола алатынын көрсету. Дамудың даңғыл жолдарын сілтеп, қолжетімді тетіктер бойынша ақпараттандыру жұмыстарын жүргізіп келеміз. Қазақстандағы нарық ережесі мен тиімді шешімдер туралы түсіндіреміз. Осы арқылы қыз-келіншектер кәсіп бастап қана қоймай, жеке тұлға ретінде де дамиды. Біз қазіргі уақытта қыздардың бәсекеге қабілетті болғанын қалаймыз.