Алматы облыстық полиция департаментінің бастамасымен Қонаев қаласында жастарды есірткіден қорғауға арналған «Есірткісіз өмір – мықтылардың таңдауы» атты кең ауқымды форум ұйымдастырылды.
Шараның мақсаты – жасөспірімдер мен студенттерге нашақорлықтың қауіптілігін түсіндіріп, салауатты өмір салтын таңдауға ынталандыру. Мемлекет басшысының бастамасымен елімізде «Нашақорлыққа және есірткі бизнесіне қарсы күрестің 2023–2025 жылдарға арналған кешенді жоспары» іске асырылып келеді. Мәселен, Алматы облысында ((«Paryz еріктілері»)) Парыз еріктілері қоғамдық бірлестігі ((«Saqtan»)) Сақтан жобасы аясында, мыңға жуық заңсыз есірткі жарнамасын жойған. Ардақ Айбарұлы әңгімелейді.
«Есірткісіз өмір – мықтылардың таңдауы» форумы Алматы облысының әкімі Марат Сұлтанғазиевтің кіріспе сөзімен ашылды. «Бұл ұран бүгінгі форумның ғана емес, барша қоғамның ортақ қағидасына айналуы тиіс», деді ол.
Абзал Ғарифуллин, актёр, блогер:
- Бізді марапаттап жатыр, өте қуаныштымыз, рақмет! Мұндай іс-шаралар негізі алдын алу мақсатында жасалады. Негізі шыны керек, полиция қызметкерлері осымен күнде арпалысып, жұмыс істеп жатады. Көптеген айтарлықтай үлкен партиядағы наркотиктарды ұстайды.
Соңғы жылдары елімізде тәркіленген синтетикалық есірткінің көлемі 10 есеге артқан. Бұл жаңа заманның қылмысы. Жай ғана қылмыстық мәселе емес, ұлт қауіпсіздігіне, ұрпақ тағдыры мен елдің ертеңіне, халықтың болашағына төнген қауіп. Сондықтан есірткіге қарсы күрес те жаңа тәсілмен, бірлескен күшпен жүргізілуі тиіс. Жалпы жыл басынан бері облыста бес нарколаборатория жабылып, заңсыз айналымнан он тоннадан астам есірткі заттары тәркіленді.
Нұрсұлтан Орынбасаров, Есірткі құқық бұзушылықтарының профилактикасы жөніндегі кеңес мүшесі:
- Жылдың басында Алматы облыстық ПД жанынан есірткіге қарсы кеңес құрылған болатын. Сол кеңеске жаңа мүшелер қабылданды. Енді осы жобамыз ары қарай өз жалғасын табады басқа аудандарда.
Форумға қатысушылар кинологиялық орталықтағы қызметтік-іздестіру иттерінің қатысуымен өткен қойылымды тамашалады. Ал жылдам қимылдайтын арнайы жасақ жауынгерлері қоян-қолтық ұрыс тәсілдері мен қарулы қылмыскерлерді тұтқындау әдісін көрсетті. Арнайы техникалары да таныстырылды.
Ардақ Айбарұлы, Аят Дүйсенбаев, Аманжол Жөңкешов
