26 мамыр күні Алматыда әлемге танымал әнші Димаш Құдайбергеннің «D and Dears» атты жанкүйерлермен кездесу кеші өтті. Шараға түрлі елдерден мыңдаған тыңдарман қатысты.

Кеш барысында әнші жүргізушілер қойған сұрақтарға жауап беріп, балалық шағындағы естеліктерімен бөлісіп, , жаңа бейнебаян түсіру барысындағы қызықты сәттермен бөлісті. Сонымен қатар, көрермендермен интеллектуалдық ойын ойнап, жеке өміріне қатысты кейбір заттарды да ашық айтты.

Шара аясында «Тау ішінде» бейнебаянының шығуына орай жарияланған #TauIshindeChallenge байқауының жеңімпаздары марапатталды. Ең креативті және көрілім саны жоғары видеолардың иелеріне әншінің Еуропада өтетін концерттеріне арнайы «Golden ticket» табысталды. Жүлдегерлер қатарында Астана қаласындағы №58 мектептің директоры Ақмоншақ Нұртаза мен Чили елінің тұрғыны Андреа бар.

Кештің әсерлі сәттерінің бірі – Қазақстан және КСРО халық әртісі Бибігүл Төлегенованың Димашты туған күнімен құттықтауы болды. Әнші аңыз тұлғаға сахнада тұрып, қоңырау шалып, ақ батасын алды.

«Димашпен осындай жылы жүздесудің куәсі болғаныма қуаныштымын. Өзімнің шығармашылық жолымды бастауға шабыт алдым », дейді көрермен Асылзат Ақылхан.

Дамира Төлеген

ЕҰУ студенті