Қазақстандық ауыл шаруашылығы саласының сарапшысы Төлеутай Рахымбеков елімізде алдағы уақытта еттің құны 15-20 мың теңгеге дейін жететінін айтты, деп хабарлайды Skifnews.kz ақпарат порталы.

Сарапшының айтуынша, алдағы жылдары сиыр етінің бағасы келісіне 15–20 мың теңгеге дейін өсуі мүмкін. Тіпті Қазақстан Өзбекстаннан ет сатып алуға мәжбүр болуы ықтимал.

"Болашақта біз өз ұлттық бешбармағымызға өзбек етін салатын боламыз. Бірақ ол кезде оның бағасы келісіне 15–20 мың теңге болады", – деді Рахымбеков Tenge Talks YouTube-арнасына берген сұхбатында.

Сарапшы 2019 жылы-ақ ет бағасының 5–6 мың теңгеге дейін қымбаттайтынын ескерткенін және оның болжамы расталғанын еске салды.

"Ол кезде мені сынға алғандар болды. Бірақ сөзім шындыққа айналды. Мен жағдайды ішінен білемін, сондықтан осындай қорытынды жасаймын", – деді ол.

Рахымбековтің айтуынша, қазіргі таңда Қазақстандағы малдың 80–90 пайызы шағын шаруашылықтардың қолында. Ал олардың өз техникасы жоқ. Өнімнің өзіндік құнының негізгі бөлігі жем мен шөпке кетеді. Фермерлер оны сатып алуға мәжбүр.

"Технологиялар болғанымен біз оларды ұмыттық. Шағын шаруаларда тек шөп қалады. Қуаңшылық бола қалса, баға бірден өседі", – деп түсіндірді маман.

Бұған дейін мәжіліс депутаты Ринат Зайытов ауылдағы фермерлер етті 3 мың теңгеден сатқанымен, қалаларда оның бағасы 6 мың теңгеге дейін жететініне наразы болған еді. Оның айтуынша, барлық пайда алыпсатарлардың қолында. Ал нағыз өндірушілер нарыққа да, жәрмеңкеге де шыға алмай отыр.

Брифинг барысында Сауда және интеграция министрі Арман Шаққалиев Қазақстанда сиыр етінің бағасы 6 мың теңгеден асып кетті деген пікірге түсініктеме берді.

"Бір апта бұрын өзім "Сауран" базарынан еттің жая бөлігін 4200 теңгеден сатып алдым. Ал онлайн саудада оралған кәуапқа арналған филе 5700 теңге шамасында болуы мүмкін. Бәрі тұтынушының сұранысына байланысты. Еттің бағасы әртүрлі. Ал мемлекеттің міндеті – халықтың әр санатына таңдау мүмкіндігін қамтамасыз ету", – деді министр.