Nordwind Airlines әуе компаниясына тиесілі Boeing-777 ұшағы Екатеринбург – Сочи бағыты бойынша ұшып бара жатып, жолаушының жағдайының күрт нашарлауына байланысты Ақтөбеге шұғыл қонған еді. Кейін ұшақ бағытын қайта жалғастырды, — деп хабарлайды Massaget.kz тілшісі.

Бұл туралы Ішкі істер министрлігі Көліктегі полиция департаментінің Ақтөбе станциясындағы желілік полиция бөлімінен хабарланды. Бұған дейін хабарланғандай, ұшақ Ақтөбеге қонғанға дейін жолаушы әйел көз жұмған.

Көліктегі полиция департаментінің мәліметінше, әйел күйеуі мен балаларының бірге еріп жүруімен Сочиге жол тартқан. Қайтыс болған әйелдің денесі Ақтөбеде қалдырылды. Ал отбасына қатысты нақты мәліметтер әзірге белгісіз. Әуе компаниясы мен медицина қызметкерлерінен ресми пікір әлі жарияланған жоқ.

"Екатеринбург – Сочи рейсі Ақтөбе уақыты бойынша шамамен 14:30-да бағытын қайта жалғастырды. Қайтыс болған әйелдің денесі облыс орталығында қалдырылды. Қазіргі уақытта Ақтөбе станциясындағы желілік полиция бөлімінің қызметкерлері оқиға орнына тексеру жүргізіп, куәгерлерден жауап алуда және бірқатар сараптамалар тағайындалуда. Нәтижесінде процессуалдық шешім қабылданатын болады", – делінген Көліктегі полиция департаменті таратқан хабарламада.

Еске салсақ, 26 мамыр күні Nordwind Airlines әуе компаниясына тиесілі Boeing-777 ұшағы бортында 564 жолаушысы бар рейспен Ақтөбеге шұғыл қонған. Себеп – жолаушы әйелдің жүрегі кенеттен тоқтап қалғаны. Кейінірек оның ұшақ жерге қонбай тұрып көз жұмғаны белгілі болды. Әйелдің жасы 42-де болған.

Аптаның басты оқиғалары мен пайдалы видеоларды көру үшін YouTube арнамызға жазылыңыз