Мәселен, алғашқы басқосуға Еуропа, Азия, Африка және Таяу Шығыстың 13 елінен бас-аяғы 17 делегация қатысқан. Кейінгісіне 43 делегация келді. Үшінші жиынға 35 елдің азаматтары келсе, төртіншісінде 85 делегация бой көрсетті. Бесінші алқалы жиынның меймандары жаһанның 49 мемлекетінен табан тіреді. Дәстүрлі діндер лидерлері съезінің алтыншы отырысына келуші делегацияның саны артып, 82-ге жетті. Ал жетінші отырыстың жөні бөлек. Оған 50 елден 100 делегация біздің елге ат басын бұрды. Биылғы елордадағы жиынға келушілер рекордтық көрсеткіш орнатты деуге болады. Алқалы сегізінші отырысқа әлемнің 60 елінен 700-ден астам адам қатысып жатыр.

Наурызбай қажы Тағанұлы, ҚМДБ төрағасы, бас мүфти:

- Адам атадан бастап күні бүгінге дейін қоғам дінсіз болмады. Әр дін әрқашан бейбітшілік орнатуға бұрыннан өзінің үлесін қосып келе жатыр. Әрине, қазір кейбір тұстарда соғыстың тоқтауына үлес қоса алмады дегенмен, басқа көптеген жерде қақтығыстардың алдын алу, қақтығыс болса тоқтатуға үлес қосып жатыр деп айтуға әбден болады. Бүгінді съезде Алла қаласа бейбітшілік орнатуға үлесін қосады деп сенеміз.