Дональд Трамп Орталық Азия мемлекеттерінің президенттерімен кездесетінін растады. Бұл Біріккен ұлттар ұйымының Бас ассамблеясы болуы ықтимал. Ақ үй қожайыны Вашингтоннан Нью-Йоркке бара жатқан сәтінде журналистермен кездесіп, ішкі және сыртқы саяси мәселелер бойынша сұрақтарға жауап берген.

Ердана Ержанұлы, тілші:

- Дональд Трамп Орталық Азия елдерінің президенттерімен жолығатынын айтты. Ақ үй қожайыны бұл кездесуді алдағы апталардағы Біріккен ұлттар ұйымының Бас ассамблеясы аясында өткізуді растады. Өткен жексенбіде ол біздің арнамыз арқылы Қазақстан тарапымен мазмұнды мәміледе екенін айтып, президентімізге сәлем жолдаса, оған дейін Өзбекстан президентімен телефон арқылы сөйлескен еді. Соған байланысты бетпе-бет кездесудің орайы туып тұрғанын сұрап едім, былай деп жауап берді.

Дональд Трамп, АҚШ президенті:

- Иә кездесемін. Олар өте жақсы адам және кездесетінімді растаймын.

Ердана Ержанұлы, тілші:

- Естеріңізге сала кетейік, Қасым-Жомарт Тоқаев пен Дональд Трамптың алғашқы кездесуі 2019 жылы дәл сол Біріккен ұлттар ұйымының Бас ассамблеясы кезінде өтсе, Джо Байденмен жолығуы Орталық Азия елдерінің ортақ жиыны форматында жүзеге асқан еді. Жекелей болса, C5+1 форматында болса да, Қазақстан-АҚШ қарым-қатынасына тың серпін беруі керек.