«Қазақстан-Қытай құбыры» серіктестігі 20 жылдан аса уақыт ішінде ел бюджетіне 140 млрд теңге салық төлеген.

Компания «Атасу – Алашанькоу» мен «Кеңқияқ-Құмкөл» мұнай құбырларын жобалаумен айналысып, құрылысын жүргізді. Магистральді мұнай құбыры арқылы қара алтынның қауіпсіз және үздіксіз тасымалын қамтамасыз етеді. Осы уақыт ішінде бірлескен кәсіпорын елеулі табысқа қол жеткізді. Соның нәтижесінде серіктестік былтыр ұзақ жылға берілген несиені мерзімінен бұрын толық төлеп тастады.

Былтыр «Атасу-Алашанькоу» арқылы 11 млн тоннадан аса, ал «Кеңқияқ-Құмкөл» құбыры арқылы 8 млн тоннаға жуық мұнай тасымалданды. «Қазақстан-Қытай құбыры» компаниясы осы стратегиялық маңызы бар екі магистральдық мұнай құбырына иелік етеді. Серіктестік «ҚазТрансОйл» мен Қытай Ұлттық мұнай мен газды барлау және игеру «CNODC» компаниясының тең басқару үлесіне ие. 2004 жылдан бері ішкі нарыққа жеткізу, экспорттық және транзиттік тасымалдау тең үлес негізінде жүзеге асырылып келеді.

Ерхат Тұрлыханов, «Қазақстан-Қытай құбыры» ЖШС бас директорының экономика жөніндегі орынбасары:

- Бүгінгі таңда біздің компания Қазақстан мен Қытай арасындағы екіжақты және өзара тиімді ынтымақтастықтың жарқын үлгісі болып табылады. 2024 жылғы ақпан айы серіктестіктің қаржылық тұрақтылығын көрсеткен маңызды кезең болды, ұзақтығы 20 жылдан асатын барлық кредиттік міндеттемелер толық әрі мерзімінен бұрын өтелді.

Былтыр серіктестік 36,5 млрд теңге рекордтық таза пайда тапты. Компания бұл жетістікке өзінің қаржылық тұрақтылығы мен еңбек тиімділігінің арқасында қол жеткізген.

Ерхат Тұрлыханов, «Қазақстан-Қытай құбыры» ЖШС бас директорының экономика жөніндегі орынбасары:

- Бұған қоса жұмыс істеген жылдар ішінде серіктестік Қазақстан бюджетіне 140 млрд теңге салық төлеп, ел экономикасының дамуына үлес қосып отыр.

Компанияның алдағы жоспары ауқымды. Екіжақты тату, ынтымақтастық моделін қалыптастыра отырып, магистральды мұнай құбырының өткізу қабілетін, жобалық қуатын жақсартуды жалғастырады.

Авторлары: Қарлығаш Қайыпбекова, Радик Жакупов