Жиынға Қорғаныс министрлігінің жетекші құрамымен қатар, мектеп ұжымдары, ардагерлер мен курсанттар қатысты

Қатысушыларды Қорғаныс министрінің тәрбие және идеологиялық жұмыстар жөніндегі орынбасары генерал-майор Шайх-Хасан Жазықбаев құттықтап, мекеменің қызметіне тоқталды. Ол әскери-техникалық мектептердің негізгі миссиясы – жұмылдыру ресурстарын толықтыру мақсатында әскерге шақырылушылар мен әскери дайындықтан өткен резервті сапалы даярлау екенін атап өтті. Сонымен қатар, мекеменің бай тарихы мен оның ел қауіпсіздігін қамтамасыз етудегі рөліне назар аударды.

Генерал-майор Шайх-Хасан Жазықбаев жұмысшы мамандықтар жылы аясында әскери-техникалық мектептердің саны артып келе жатқанын жеткізді. Қазіргі уақытта қорғаныс саласының, мемлекеттің тиімді дамуына қажетті мамандарды даярлаудағы жауапкершілігі зор екенін айтты.

Әскери-техникалық мектептер Ақтөбе, Алматы, Атырау, Қарағанды, Көкшетау, Қызылорда, Павлодар, Семей, Талдықорған, Тараз, Өскемен, Орал және Шымкент қалаларында жұмыс істейді. Бұл мекемелер азаматтарды атқыш, мерген, граната лақтырушы, барлаушы, ұшқышсыз ұшу аппараттарының операторы, «B, C, C1» санатындағы жүргізуші, МТЛБ механик-жүргізушісі, радиотелеграфист сынды әскери есептік мамандықтар бойынша даярлайды. Уақыт талабына сай оқу бағдарламалары мен мамандықтар тізімі үнемі жаңартылып отырады.

- Біздің мекеме қорғаныс және азаматтық бейіндегі мамандарды даярлау жүйесіндегі маңызды буыны, кәсібиліктің, патриотизмнің және Отанға адалдықтың тірегі болды. Біз жүріп өткен жол – беріктіктің, тұрақтылықтың және ынтымақтастықтың жоғары сапасының дәлелі. Ширек ғасыр – біз оқыған, оқытқан, жетілдірген және кәсіби мәдениетті қалыптастырған, лайықты азаматтардың жаңа буынын, мемлекетіміздің қорғаушыларын тәрбиелеп шығарған уақыт, — деді өз сөзінде ҚР Қорғаныс министрлігі Әскери-техникалық мектебінің бас директоры генерал-майор Әділбек Алдабергенов.

Мерейтой аясында бірқатар әскери қызметшілер, мамандар мен ардагерлер «Ел қорғаны» ведомстволық медалімен, сондай-ақ Қорғаныс министрі мен Әскери-техникалық мектеп бас директорының атынан марапаттармен және бағалы сыйлықтармен марапатталды.

Салтанатты іс-шара Ұлттық әскери-патриоттық орталықтың шығармашылық ұжымы дайындаған концерттік бағдарламамен аяқталды.

Дамира Төлеген

ЕҰУ студенті