Ұлытау ауылында салынып жатқан аудандық аурухана ғимараты жыл соңына дейін қолданысқа берілетін болды.

Нысанның құрылысы 3 жыл бұрын басталып, арасында бірнеше рет тоқтап қалды. Жобаға түзету енгізілді. Кейін құрылыс алаңында жерасты суы көтеріліп кетті. Қазіргі таңда құрылыс қайта жанданып, мердігер жұмыстың негізгі бөлігін аяқтады.

Ұлытау ауданында типтік үлгіде алғашқы аурухананың құрылысы жүріп жатыр. Нысанның тапсырылуын ұжым мен тұрғындар асыға күтіп жүр. Аурухананың қазіргі ғимараты талапқа сай келмейді. 25 жыл бұрын балабақшаға лайықталып салынған.

Ақзейнеп Наурызбаева, аудандық аурухананың дәрігері:

- Ешқандай санитарлық нормаға сәйкес келмейді. Тар. Кабинеттер жетіспейді. Жаңадан салынып жатқан больницаның құрылысы басталғанда өте қуандық. Ұлытау ауданында киелі жерде бір больница болады ғой деп. Бірақ бұл больницаның құрылысы әлі де баяулап, уақытында берілмейтін түрі бар.

Дәрігерлердің алаңдауы бекер емес. Құрылысты аяқтау мерзімі екі рет кейінге шегерілді. Жауаптылардың айтуынша, оның бірнеше себебі бар. Алғашында сметалық құжатқа түзету енгізілді, кейін тағы бір блок қосу үшін тағы тоқтап қалды. Құрылыс қайта жанданғанда, жерасты суы көтеріліп кеткен.

Әли Бекенов, құрылыс, сәулет және қала құрылысы басқармасының бөлім басшысы:

- Сметалық құжаттаманы өзгертпестен жұмыс жобасына түзету енгізілуде. Ол жоба қазір мемлекеттік сараптамада жатыр. Жақында қорытындысы шығуы керек. Соған қарамастан құрылыс жұмыстары жалғасуда. Жыл соңына дейін нысанды қолданысқа береміз.

«Ауыл — ел бесігі» бағдарламасымен жасалған жобаның құны 3 млрд теңгеге жуық. Бес блоктан тұратын ауруханаға соңғы үлгідегі жабдықтар қойылады. Күндізгі емханасы күніне 100 адамды қабылдай алады. Жалпы Ұлытау облысында биыл 14 медицина мекемесін қолданысқа беру жоспарланған. Оның барлығы ауылдық жерде салынып жатыр.

Елдос Кәкенов, Нұрдәулет Аманкешов, Гүлшаһира Серекбаева