Жайық өзенінен 18 жастағы қыз өлі табылды. Қайғылы оқиға Атырау облысы Индер ауданында болған, — деп хабарлайды Massaget.kz тілшісі.

Марқұм сол күні құрбысының үйінде қонған. Таңертең оны ешкім таппай қалған. Шарқ ұрып іздегендер бойжеткеннің таңғы сағат бес жарымда көпірге көтеріліп бара жатқанын бейнебақылау камерасынан байқаған. Сол себепті құтқарушыларға хабарлап, сүңгуірлер қыздың денесін Жайық өзенінен алып шықты.

Марқұм колледж студенті болған. Полицейлер мәліметінше, қыз өз-өзіне қол жұмсаған. Бейресми ақпарат бойынша бойжеткен құрбысына соңғы хатын жазып қалдырған.

"Индер ауданында 18 жастағы қыздың өліміне қатысты өз-өзін өлтіру дерегімен қылмыстық іс тіркелді. Кешенді тергеу жүріп жатыр. Өзге ақпарат тергеу мүдесіне сәйкес жарияланбайды", — деді Атырау облысы ПД ресми өкілі Мейірім Ердәулет.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!