АҚШ Иранның әуе кеңістігін толық бақылауға алды. Бұл туралы президент Дональд Трамп өзінің әлеуметтік желілерінде хабарлады. Ақ үй басшысы, сондай-ақ Иран көсемі Аятолла Әли Хаменеидің қай жерде екенін жақсы біледі, бірақ әзірге оған тиіспейтінін жеткізді. Алайда АҚШ-тың шыдамы ұзаққа бара ма?
Канададағы «Үлкен жетілік» саммитінен ерте қайтқан Дональд Трамптың әрекетінен көпшілік жақсы бір белгі көргендей еді. Жиынға қатысып жатқан Франция президенті Эммануэль Макрон: «Иран мен Израиль арасындағы бейбіт келісімнің ықтималдығы жоғарылап, Трамп Вашингтонға сол үшін оралған болса керек», – деп топшылады. Алайда олай болмай шықты.
Дональд Трамп, АҚШ президенті:
- Біз бітімге ұмтылып жатқанымыз жоқ. Мен: «Бітім қажет дедім», – деп айтпадым. Бұл Эммануэльдің сөзі. Жақсы жігіт, бірақ көбіне дұрыс түсінбей жатады. Бізге бітімнен де маңызды нәрсе керек. Қазір жағдайымыз жаман емес. Ең бастысы Иран ядролық қаруға ие болмауы қажет. Бұл қарапайым қағида. Тереңдеп қажеті жоқ. Біз соғыстың аяқталғанын қалаймыз. Жай бітіммен емес, түгел тоқтауын қалаймыз.
Канададан оралған АҚШ президентінің ұшағы Вашингтонға келіп қонды. Содан кейін Дональд Трамп Израиль Премьер-министрі Беньямин Нетаньяхумен телефон арқылы сөйлесті. Бірақ олардың не жайлы әңгімелескендері жария етілмеді. Ал ақпарат құралдарының хабарлауынша, Ақ үйдің Situation Room атты кеңсесінде кешелі бері қызу қарбалас. Әдетте бұл орында соғыс секілді аса маңызды жағдайлар кезінде мамандар президентпен бас қосады. Қауіпсіздік кеңесінің мүшелерімен болған жиын бүгін 1 сағат 20 минутқа созылды. CNN-ге анонимді түрде хабар берген АҚШ үкіметінің өкілдері: «Вашингтон Тель-Авивке көмекке баруы әбден мүмкін», – деп отыр.
Әзірге ресми түрде ақпарат тарамаса да, Израиль АҚШ-тың бункер жарғыш бомбаларын сұрағаны белгілі. Тек америкалықтардың қорамсасындағы қару алдымен жерді 60-70 метр көлемінде бұрғылап тесіп, содан кейін жарылатын қабілетке ие. Алайда Иранның Фурдодағы уран байытқыш нысандары 90-100 метр жер астында орналасуы мүмкін. Сондай-ақ бүгін АҚШ президенті Иранның толық берілуі керектігін әлеуметтік желілерде хабарлаған еді. Оған Иран көсемі Хаменеи: «Нағыз соғысты бүгін бастаймыз», – деп жауап берді. Осыған байланысты АҚШ-тың Иерусалимдегі елшілігі сәрсенбіден жұмаға дейін үш күнге жабылмақ.
