Ақтөбелік учаскелік полицей өрт болып жатқан үйден он бес адамды құтқарды. Олардың арасында мүмкіндігі шектеулі тұрғын мен өздігінен жүре алмайтын зейнеткер де бар.

Әлихан өзіне бекітілген аумақта қызметте жүрген. Көп қабатты үйлердің бірінен өрт шыққанын естіп, дереу сол жерге жетеді. Ұзақ ойланбастан бірден жоғарғы қабаттағы тұрғындарды сыртқа шығара бастаған. Құтқарушылар жетем дегенше зейнеткер мен сал ауруына шалдыққан қызды көтеріп алып шыққан. Бүгін ол өзі қауіптен арашалап қалған жандарға келіп, жағдайларын білді. Зейнеткерлер ержүрек полицейге алғыстарын жаудырды. Айтуларынша, тоғыз қабатты үйдің бірінші қабаты жанған. Тұрғындар бірнеше күн жарықсыз отырды. Ең бастысы, жанымыз аман қалды дейді олар.

Әлихан Саймағамбетов, учаскелік полиция инспекторы:

Алтыншы, жетінші қабаттарда мүгедек адам бар, үлкен кісілер бар деген. Ойланбастан үстіге көтеріліп кеттім. Барлықтарын, он бес шақты адамды шығардым. Пожарный да, скорый да келді. Адам шығыны болған жоқ.

Жақсыбек Кемал