Қытайлық инвесторлар Шымкент мұнай өңдеу зауытын жаңғыртуға қаржы құяды. Сондай-ақ Ақтөбеде ашылғалы жатқан карбамид өндіретін кәсіпорынға 1 млрд доллар көлемінде несие береді. Бүгін Астанада «Орталық Азия энергиясы + Қытай» форумы өтіп жатыр. Жиында елдеріміз арасында 60-қа жуық келісім жасалатыны айтылды. Ол қандай жобалар?! Форумға қатысқан тілшіміз Нұрсұлтан Тілектес тарқатып айтады.

Форумға қатысуға келген China Power компаниясның басқарма төрағасы жиналғандармен иіліп тұрып амандасты. Артынан өз сөзінде бұл қазақ халқына деген құрметінің нышаны екенін жеткізді. Оның сөзінше, Қазақстан мен Қытай ескі дос, сенімді серіктес әрі стратегиялық әріптес.

Динг Янджанг, «China power» компаниясының басқарма төрағасы:

Қазақстан мен Қытай достастығының тамыры тереңде жатыр. Уақыт өте арадағы байланыс нығая түсті. Бүгінде екі ел арасында көптеген салалар бойынша алыс-беріс жақсы жолға қойылған. Ендігі меже – жасыл энергетика бағытындағы серіктестікті дамыту.

Энергетика министрінің сөзінше, қазіргі таңда Қазақстан мен Қытай жаңартылатын энергия бағытында 30-дан астам жобаны жүзеге асырып жатыр.

Ерлан Ақкенженов, Энергетика министрі:

Екі ел қарым-қатынасы қазір бірлескен әрі технологиялық тұрғыдан бай экожүйеге бағыт алды. Қазіргі кезде Қытай компанияларының қатысуымен жаңартылатын энергия бойынша 30 жоба жүзеге асырылып жатыр, жалпы қуаттылығы 1700 МВт.

Форумда түске дейін CNPC компаниясы мен Шымкент мұнай өңдеу зауытын жаңғырту туралы келісімге қол қойылды. Кәсіпорын қуаты енді 12 млн тоннаға жетеді. Бұл еліміздің шикізат өңдеу, мұнай өнімдерін экспорттау әлеуеті артады. Сондай-ақ Ақтөбе облысында карбамид өндіретін зауытты іске қосуға арналған келісім жасалды.

Нұрсұлтан Тілектес, тілші:

Қазақстан мен Қытай осы форум аясында құны 25 млрд АҚШ доллары болатын 60-қа жуық келісім жасайды. Оның ішінде «Seraphim» компаниясымен жасыл сутегі өндіру туралы бірлескен жобаны ерекше атауға болады. Бұл жаңартылатын энергия көздерін пайдалана отырып өндірілетін, экологиялық таза отын түрі. Оны болашақта өнеркәсіп, химия, энергетика, авиация және кеме қатынасы, сондай-ақ көлік саласында пайдалану көзделіп отыр.

Бүгінде Қытай, Жапония, Оңтүстік Корея, АҚШ, Германия және Сауд Арабиясы секілді елдер бұл технологияға ерекше назар аударып отыр. Өйткені экологиялық тұрғыдан таза әрі тиімді.

Нұрсұлтан Тілектес