Волейболды отырып ойнаудан Қазақстан құрамасы Азия чемпионы атанды, деп хабарлайды 24kz.

Ханчжоу қаласында өткен бәсекенің шешуші кезеңінде жерлестеріміз қытайлық спортшыларды 3:2 есебімен ұтты. Осылайша, бұл спорт түрінен ел тарихында алғаш рет қоржынға алтын медаль түсті. Чемпионат барысында Қазақстан құрамасы Сауд Арабиясы, Жапония және Австралия командаларын, сондай-ақ жартылай финалда Таиланд құрамасын жеңген болатын. Сайыс қорытындысы бойынша командалық есепте бірінші орынды Қазақстан құрамасы алса, екінші орын Қытай, үшінші орын Таиланд спортшыларына бұйырды. Ал 2026 жылы жерлестеріміз Қытайда өтетін әлем чемпионатында бақ сынайды.