Ұлттық студенттер спорты одағының президенті бұл халықаралық ұйымдардың Қазақстанға деген зор сенімін білдіретінін айтты.

Халықаралық университеттер спорты федерациясы (FISU) 2026 жылы бокстан студенттер арасындағы Әлем чемпионатын Қазақстанда өткізуді ұсынып отыр. Мұндай қуанышты жаңалықты бүгін Ұлттық студенттер спорты одағының президенті Қайрат Закирьянов журналистермен бөлісті.

Оның айтуынша, Қытайдың Макао қаласында өткен Азия университеттік спорт федерациясының Бас ассамблеясында FISU тарапынан осындай бастама көтерілген. Егер бұл жоба жүзеге асса, Әлем чемпионаты Қазақстанда 2006 жылы өткен чемпионаттан кейінгі ірі байрақты бәсеке болмақ.

Ұлттық студенттер спорты одағының президенті Қайрат Закирьяновтың айтуынша, Халықаралық университеттер спорты федерациясы Қазақстанда кейінгі жылдары өткізілген әлемдік жарыстарға жоғары баға берген. Бұл ретте 2017 жылы Қазақстанда жоғары деңгейде өткізілген Бүкіләлемдік қысқы Универсиада ерекше рөлге ие. Айта кетейік, бұл универсиаданы өткізу бастамасын да Қайрат Закирьянов көтерген болатын.

"Халықаралық университеттер спорты федерациясы және спорт саласындағы өзге де халықаралық ұйымдардың студенттер арасында Әлем чемпионатын Қазақстанда өткізу туралы ұсынысы бізге деген зор сенімді білдіреді және елімізге жаңа мүмкіндіктер ашады. FISU президенті Леонц Эдер бұл ретте Қазақстанның әлемдік деңгейдегі сорттық шараларды өткізудегі тәжірибесін жоғары бағалады. Бұл біз үшін мақтаныш болса, екінші жағынан үлкен жауапкершілік жүктейді", – деді Қайрат Закирьянов.

Қазіргі таңда Халықаралық университеттер спорты федерациясының жаңа ұсынысына орай, қазір бұл бастама жан-жақты зерделеніп жатыр. Қайрат Закирьянов оған WORLD Boxing халықаралық ұйымының қолдау көрсетіп отырғанын жеткізді. Мұндай қолдау жарыстың халықаралық беделін арттырып, әлемнің мықты жас боксшыларының қызығушылығын күшейтеді.

Шарада белгілі болған тағы бір жаңалық – FISU 2029 жылғы Бүкіләлемдік қысқы универсиаданы Қазақстанда екінші рет өткізу мүмкіндігін де талқылаған. Әзірге бұл бастама деңгейінде болғанымен, ол да халықаралық қауымдастықтың елімізге деген жоғары сенімін көрсетеді.

Қайрат Закирьянов бастамалар оңынан жүзеге асса, Қазақстан алдағы жылдары әлемдік студенттік спорттың басты орталықтарының біріне айналатынына сенім білдірді.

Оқи отырыңыз:

• Алматыда Қазақ спорт және туризм академиясының жаңа заманауи күрес спорт кешені ашылды
• Қазақстандық студенттер III Түркі универсиадасында 23 медаль жеңіп алды