Құрбан айтта сойылатын малдың жасына және денсаулығына қойылатын шариғат талаптары бар.

Бас мүфти кеңесші Смайыл Сейітбеков 4-5 айлық қозылардың құрбандық ретінде есептелмейтінін ескертті, деп хабарлайды inbusiness.kz сайты.

Яғни, құрбандыққа шалынатын қой мен ешкі кемі 1 жасқа, сиыр (ірі қара) 2 жасқа және түйе 5 жасқа толуы шарт. Сол секілді, малдың ақсақ-тоқсақ, соқыр, құлағы не құйрығы жартысынан көбі кесілген немесе тым арық болмауы қажет.

Осыған дейін ҚМДБ төрағасы, бас мүфти Наурызбай қажы Тағанұлы еліміздегі мал базарларын аралап, саудагерлер мен кәсіпкерлерді мереке күндері бағаны қолдан шарықтатпауға шақырған еді.

– Бас мүфти халыққа ыңғайлы болуы үшін мал бағасын қолдан қымбаттатпауды, пайдакүнемдікке салынбауды сұрады. Себебі, бұл күн – саудамен пайда табатын емес, сауап жинайтын күн. Құрбандық еті түгелдей дерлік әлеуметтік жағдайы төмен, мұқтаж отбасыларға таратылады, – деді Бас мүфти кеңесшісі.

Ескерте кетерлігі, қой мен ешкі тек бір адамның атынан ғана шалынады. Ал сиыр немесе түйе малын 7 адамға дейін бірігіп шалуға мүмкіндік бар. Десе де, мұнда ниеттің түзулігі маңызды рөл атқарады.

– Ірі қараға біріккен 7 адамның да ниеті тек Алла ризашылығы үшін құрбан шалу болуы керек. Егер арасындағы бір адам "маған қонақ шақыруға ет керек еді" деген ниетпен қосылса, қалған 6 адамның да құрбандығы жарамсыз болып қалады. Сондай-ақ, сойылған малдың етін үш бөлікке бөлген абзал. Бір бөлігі өз отбасына, екінші бөлігі туған-туыс пен көршілерге, үшінші бөлігі жетім-жесірлер мен мұқтаждарға үлестіріледі, – деп сөзін қорытындылады Смайыл Сейітбеков.