Қазақстан мен Ресей шекарасындағы үш өткізу пунктінде жөндеу жұмыстары жүріп жатыр, салдарынан шекарадан өту кезіндегі күту уақыты ұзаруы мүмкін , — деп хабарлайды Massaget.kz тілшісі ҰҚК Шекара қызметіне сілтеме жасап.

Әңгіме "Сырым", "Әлімбет" және "Қосақ" өткізу пункттері туралы болып отыр.

"Сырым" өткізу пункті Қазақстан мен Ресей шекарасында Батыс Қазақстан облысында, "М-32 Самара — Шымкент" халықаралық трассасында орналасқан. Ресей жағындағы сәйкес өткізбек пункт — "Маштаково".

"Әлімбет" өткізу пункті Ресеймен шекарада Ақтөбе облысында орналасқан. Ресей жағында оған қарама-қарсы "Орск" өткізу пункті бар.

"Қосақ" өткізу пункті Павлодар облысының Успен ауданы аумағында, сондай-ақ, Ресеймен шекарада орналасқан. Бұл — автокөлік өткізу пункті.

"Осы жайларды ескере отырып, жүріс бағытыңызды алдын ала түзетуді сұраймыз", — делінген ҰҚК Шекара қызметінің хабарламасында.

Қалған өткізу пункттері қалыпты режимде жұмыс істеп тұр. Мемлекеттік шекарада қандай да бір шектеу шаралары енгізілген жоқ.

Instagram парақшамызға жазылып, ең қызықты ақпараттарды бірінші болып оқыңыз!