Қазақстанның бірінші ракеткасы Елена Рыбакина Алматыда жас теннисшілермен кездесті. 2022 жылғы Уимблдон чемпионы балдырғандарға қолтаңба беріп, ашық жаттығу өткізді. Рыбакинамен кездесуге 50-ден аса әуесқой теннисші жиналды.

Олар кезек-кезегімен кортқа шығып, Еленаның ақыл-кеңесіне қанықты. Ашық жаттығудан соң баспасөз мәслихатын өткізіп журналистердің сұрағына жауап берді. Ұлттық құрама 16 қыркүйекте Қытайдың Шенжең қаласында өтетін Әйелдер арасындағы командалық әлем чемпионатына қатысады. Билли Джин Кинг Кубогының ширек финалында Қазақстан құрамасы АҚШ командасына қарсы ойнайды. Ел намысын Елена Рыбакина, Юлия Путинцева, Жібек Құламбаева, Зарина Диас және Анна Данилина қорғайды.

Елена Рыбакина, теннисші, әлемнің оныншы ракеткасы:

- Ұлттық құрамаға Америкаға қарсы ойын үлкен сынақ болғалы тұр. Біз үшін маусым әлі аяқталған жоқ. Бар күшімізді салып, жеңуге тырысамыз. Бірақ біздің қарсыластырамыз да оңай емес. АҚШ командасында әлемге танымал теннисшілер бар. Сондықтан тыңғылықты дайындалып жатырмыз.

Билли Джин Кинг Кубогының ширек финалында Қазақстан мен АҚШ-тан өзге Италия, Қытай, Испания қыздары да бақ сынайды. Сондай-ақ Украина, Жапония және Ұлыбританияның командалары да жеңістен үмітті. Елена Рыбакина қазір ITF рейтингінде оныншы орында тұр. Ол алдағы уақытта басқа да жарыстарға қатысып рейтингін жақсартуды жоспарлап жүргенін айтты.