Денсаулық сақтау министрі Ақмарал Әлназарова Алматыдағы Сызғанов орталығындағы дауға қатысты пікір білдірді, — деп хабарлайды Massaget.kz тілшісі.

Мән-жайы

Қазақстандық актриса, продюсер Айнұр Ілиясова әлеуметтік желілерде жазба жариялап, Алматыдағы А.Н. Сызғанов атындағы Ұлттық ғылыми хирургия орталығының анестезиологына шағымданды. Оның айтуынша, дәрігер отадан кейін одан ақша талап еткен.

Айнұр Ілиясованың айтуынша, жақында анасына осы орталықта ота жасалған. Ота алдында әйелден жақын туысының байланыс нөмірін қалдыруды сұраған. Алайда жазба авторының айтуынша, анестезиолог ол нөмірді жеке пайдасына сұраған.

Министрлік не дейді?

Министр Ақмарал Әлназарова орталықта ішкі қызметтік тергеу жүргізілгенін растады.

"Тергеу нәтижесінде анестезиолог-дәрігердің әрекеттерінен сыбайлас жемқорлық дерегі байқамалды. Этикалық комиссия оның әрекеттерінде тәртіптік теріс қылық белгілері барын анықтап, этикалық нормаларды сақтамағаны үшін тәртіптік жауапкершілікке тартылуға тиіс деген қорытындыға келді", — деді министр.

Сонымен қатар, Ақмарал Әлназарова анестезиолог-дәрігер өзі жұмыстан шығу туралы өтініш бергенін және 2025 жылғы 22 тамызда жұмыстан кеткенін айтты.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!