Астана Файнанс дэйске арнайы шақырылған спикерлер кімдер?

Ең белді сарапшылардың тізіміне үңіліп көрсек: Бретт Кинг — бестселлер авторы әрі футуролог. Әлемдегі алғашқы мобильді необанк Moven компаниясының негізін қалаушы, және финтэк тақырыбындағы Breaking Banks подкастының жүргізушісі. Джад Эллаун Brookfield компаниясының басқарушы серіктесі әрі Таяу Шығыс өңірі бойынша жетекшісі. Аймақтағы инвестициялық стратегия мен операцияларға жауапты менеджер саналады.

Форумға қатысушылардың арасында Түркі мемлекеттері ұйымының бас хатшысы Кубанычбек Омуралиев бар. Ол Қырғыз Республикасының тәжірибелі дипломаты және мемлекеттік қайраткері. Сондай-ақ Mastercard корпорациясының вице-президенті, өнім менеджері Хусам Хаббанакех шақырылған екен. Ол банк ісі мен технология саласында 20 жылдан астам тәжірибесі бар цифрлық төлемдер мен финтех жөніндегі белді сарапшы.

Goldman Sachs компаниясының серіктесі Рияд Юсуф та спикерлер қатарында. Ол Лондондағы Deutsche Bank-та сегіз жыл жұмыс істеп, дамушы нарықтар бойынша пайыздық мөлшерлемелер құрылымы тобына жетекшілік етті. Құрметті спикерлердің тағы бірі Хани Каблави, БиЭнУай (BNY) компаниясының аға атқарушы вице-президенті әрі халықаралық бөлімнің басшысы. Еуропа мен Ұлыбританиядағы банк директорлары кеңестерінің мүшесі. Янус Хэндерсон Инвесторс компаниясының Таяу Шығыс, Африка және Орталық Азия өңіріндегі жетекшісі Мешал Джабер ӘлФарас та форумда сөз сөйлейді.