Қазақстанның ІІМ жол қозғалысы ережелерін оқытуды мектеп бағдарламасына жеке міндетті пән ретінде қосуды ұсынды. Бұл туралы Орталық коммуникациялар қызметіндегі брифингте ІІМ Әкімшілік полиция комитетінің төрағасы Қайсар Сұлтанбаев мәлімдеді, — деп хабарлайды Massaget.kz тілшісі.

Сұлтанбаевтың айтуынша, мұндай сабақтар арқылы балаларға жолдағы заңға бағыну мәдениетін үйретуге болады, бұл балалардың есейіп көлік жүргізе бастағанда жол қауіпсіздігіне оң әсерін тигізеді.

ІІМ-де балалардың жол-көлік жарақаттануын алдын алудың тиімді құралы ретінде мектептердегі жас жол инспекторларының жұмысын атап өтті.

"Әлемнің көптеген елінде мектеп оқушыларын жол қозғалысы қауіпсіздігіне тарту идеясы білім беру мен қоғамдық мәдениеттің бір бөлігіне айналған. Халықаралық тәжірибе мұндай бастамалардың жол-көлік жарақаттарын азайтып, өскелең ұрпақта азаматтық жауапкершілік сезімін қалыптастыратынын көрсетеді", – деді комитет төрағасы.

1 қыркүйек қарсаңында ІІМ ата-аналар мен мұғалімдерді полицейлермен бірге әр баланың үйден мектепке және кері бағыттағы ең қауіпсіз жолын белгілеуге шақырды.

"Бала мектепке және үйге әрдайым бір ғана ең қауіпсіз бағытпен қатынауы тиіс, оны жатқа білуі қажет", – деп атап өтті ведомство.

Қызықты жаңалықтар мен видеоларды көру үшін TikTok арнамызға жазылыңыз!