Жаңа су кодексі күшіне енді.

Демек, су нысандарын қорғау күшейіп, су инспекторларының құзыреті артты. Заңға енген осы және өзге де өзгерістердің нәтижесі қандай болмақ? Саладағы күрмеулі мәселерді шешуге жаңа құжат септесе ала ма?

Суды үнемдеу бүгінде әлем елдерін алаңдатқан мәселе. Сондықтан жаңа кодексте алдымен тіршілік нәрін бейберекет пайдалануға жол бермеу жайы қарастырылған. Әсіресе егін шаруашылығында. Енді су үнемдеу технологияларын кеңінен қолданған шаруаға мемлекет тиісті қолдау көрсетеді.

Еркебұлан Мәмбетов, ҚР Парламенті Мәжілісінің депутаты:

- Суды жай пайдаланамыз дегенбіз. Қазір Президентіміз қойған тапсырма: су ресурстарын үнемдеп ұстау. Қазақстан ғана емес, табиғат өзгерістері болып жатыр. Өңірлерге барамыз сол кезде халыққа түсіндіріп, бәріміз де соған кірісуге тиіспіз.

Сондай-ақ Заңнамаға алғаш рет "су қауіпсіздігі" ұғымы енгізілді. Бұл елімізді су тапшылығы, су айдындарын ластау мен су көздерінің сарқылуының алдын алады, дейді мамандар. Тағы бір маңызды тармақ — судың көлеңкелі нарығымен күресуге бағытталған. Яғни бассыздықтардың жолын кесу үшін су инспекторларының құзыреті кеңейді.

Азаматхан Әміртай, сарапшы:

- Мен кеше Сарыағашта болдым. Арнайы халық шақырды. Сонда бір қызығы, шипажайлар салынып жатыр екен. Өте көп енді шипажай. Ол жерде кәріз суына арналған инфрақұлымы тек қана көп пәтерлі үйлермен белгілі бір нысандарға арналған екен. Ал шипажайлардың қалдық суын алып жүруге тартпайды екен. Шипажайға адамдар емделуге келеді. Ішек құрылысын, жараларын. Әртүрлі дәрілерді химикаттарды пайдаланады. Ол Келес өзенінен құйылып жатыр.

Құжатта су нысандарын қорғау бойынша талап күшейтілген. Жекенің қолына өтіп кеткен су қоймаларының иелері жағдайды түземесе, жауапқа тартылады. Жаңа су саясаты ашықтық қағидатына негізделген, дейді сарапшылар. Бұдан былай су айдындарын сақтау мен пайдалану туралы барлық ақпарат жыл сайын ашық дереккөзде жарияланады.

Назерке Тоқжан