40-тан аса қатысушы екі күн бойы өндіріс алаңына келетін студенттермен нәтижелі жұмыс істеудің қыр-сырын меңгерді.

Колледж оқытушылары, өндіріс шеберлері мен бизнес өкілдері болашақ мамандардың біліктілігін арттыру ғана емес, жастардың еңбекке деген ынтасын ашу мәселесін талқылады.

Әсел Жекенованың тігін цехында қазір 2 тәлімгер бар. Олар тәжірибе үйренуге келген студенттерге тігіншіліктің қыр-сырын үйретеді. Мұнда жастар тапсырысты қабылдаудан бастап, дизайн дайындау, пішу, тігу жұмыстарын толық меңгереді. Әсел студенттерге тігін тәсілдерін ғана емес, табыс табу жолын да айтып отырады.

Әсел Жекенова, кәсіпкер:

- Практика жүзінде студенттерді оқытамыз. Және бұл студенттерге өзіміздің тәжірибемізді, білімізді бергеннен кейін тәлімгер болып аталып кеттік. Яғни олар колледжде теориялық оқуды өткенімен тігін өндірісімізде практиканы өтеді. Әрі қарай бұл жұмыс жасаймын деген студенттерді біз жұмысқа қабылдап және оларға ақылы жұмыс табыстаймыз.

Тәлімгерлік жүйесінің жұмысын оңтайландыру мақсатында өндіріс мамандарына арналған семинар өтті. Әсел Жекенова да мұнда білімін жетілдіріп жатыр. Өйткені дуалды білім беру жәй ғана теория емес, кәсіптің қыр-сырын меңгерген маман даярлау. Сондай-ақ жастардың ынтасын ашып, қызығушылығын ояту маңызды. Дегенмен кәсіпкерлер палатасы директорының айтуынша, қазір колледждегі білім мен қысқа мерзімді курстардың ара-жігі анық ажыратылмай келеді.

Рашит Мұстапаев, облыстық кәсіпкерлер палатасының директоры:

- Қазіргі таңда болонская системамен біздерге колледждерде, университеттерде беріп жатқан мамандарға тек специалность деген жазылады. Мысалы бакалавр, я магистр деп жазылады. Бірақ квалификация деген нәрсе жоқ. Ол ненің бакалавры, ненің магистрі дегендей. Сондықтан осы ертең мекеме басшылары соған наставниктердің айтуына қарап, олардвң кеңесіне қарап, шешім қабылдай алады.

Тәлімгерлер болашақ мамандардың біліктілік деңгейін нақты анықтай білуі керек. Семинарда кәсіби білім мен тәжірибе мәселесі ғана емес, жастармен тіл табысып, өндірістік ортаға бейімдеу туралы да айтылды. Өйткені студенттің қалыптасуы жолында тәлімгердің маңызы зор, дейді мамандар.

Асланбек Шығыр, Тамара Степанова, Ренат Дусалиев