Нора Джеруто 5000 метрге жүгіруден де қарсылас шақ келтірмеді.

Қазақстан атынан сынға түсіп жатқан жеңіл атлет Нора Джеруто Оңтүстік Кореяның Гуми қаласында өтіп жатқан Азия чемпионатында өзінің екінші алтын медалін жеңіп алды.

Бүгін, 31 мамырда Джеруто әйелдер арасындағы 5000 метрге жүгіру финалында мәре сызығын бірінші болып кесіп, өз мықтылығын тағы бір дәлелдеді.

Оның көрсеткіші — 14 минут 58.71 секунд. Бұл — тек Азия деңгейінде емес, әлемдік деңгейдегі жоғары нәтиже. Екінші орынға үндістандық Парул Чаудхари (15:15.33) табан тіресе, үздік үштікті жапониялық Юма Ямамото (15:16.86) түйіндеді.

Нора Джеруто бұған дейін 3000 метрге кедергілер арқылы жүгіру жарысында да алтын алған болатын. Енді, екі алтынмен ел намысын асқақтатқан спортшы Азия чемпионатының басты жұлдыздарының біріне айналды.