Құлсары қаласында жанар-жағармай құю бекетінде болған жарылыс салдарынан зардап шеккендердің арасында төрт бала бар. Бұл мәліметті Атырау облысының Денсаулық сақтау басқармасы нақтылады, деп хабарлайды Zakon.kz.
Облыстық денсаулық сақтау басқармасы 30 мамырда кешке Қаратон ауылындағы жанар-жағармай құю бекетінде болған өрт салдарынан зардап шеккен 14 адамның Жылыой аудандық орталық ауруханасының қабылдау бөліміне жеткізілгенін, олардың ішінде төрт бала барын хабарлайды.
"Алғашқы тексеруден өтіп, қажетті диагностика жүргізілгеннен кейін 10 адам ауруханаға жатқызылды. Ал төртеуі амбулаториялық бақылауда болып, тұрақты мекен-жайы бойынша ем алуға жіберілді. Қазіргі уақытта ауыр жансақтау бөліміне түскен науқастар жоқ", — деді басқармадағылар.
Зардап шеккендердің жетеуі орташа ауырлық дәрежеде, тағы үшеуі — тұрақты жағдайда екендігі әрі олардың өміріне қауіп төндіретіндей асқынулар байқалмайтыны да нақтыланады.
"Зардап шеккендердің барлығы қажетті медициналық көмекті толық көлемде алады. Жылыой аудандық орталық ауруханасына Атырау қаласынан, оның ішінде күйік орталығы мамандары мен медициналық қызметкерлері жіберілді", — деп толықтырады басқармадағылар.
Бұған дейін Атырау облысының әкімі Серік Шәпкенов Жылыой ауданы Құлсары қаласындағы "Ниет" жанар-жағармай құю бекетіндегі өрт пен жарылысқа қатысты жедел штабтың шұғыл отырысын өткізгені хабарланған.
