Қазақстан экономикасы жақсы өсіп жатқанымен, алдағы уақытта оны тежейтін қауіптер бар. Бұл туралы Халықаралық валюта қорының (ХВҚ) мәлімдемесінде жазылған.

Аталған мәлімдемеді Ұлттық банк өз сайтында жариялады, деп жазады inbusiness.kz сайты.

Халықаралық қор мамандары Қазақстанда инфляция көрсеткіші өсіп жатқанын, 2025 жылы 10,5% деңгейінде қалуы мүмкін деген болжам айтады.Бұл – Ұлттық банктің нысаналы көрсеткішінен әлдеқайда жоғары. Мамандар тежеуші ақша-несие саясатын жалғастыруды, яғни базалық мөлшерлемені жоғары ұстауды ұсынды. Себебі, баға өсімі халықтың сатып алу қабілетін төмендетіп, экономиканың тұрақтылығына қауіп төндіреді.

Қазақстан экспорты мен бюджетінің басты табыс көзі – мұнай мен газ. ХВҚ сарапшылары егер мұнай бағасы төмендесе, бұл ел қазынасына қосымша салмақ түсіреді деп отыр. Бюджет тапшылығы тағы бар. Қазақстанның басты сауда серіктестері саналатын елдердегі экономикалық өсім де баяулап жатыр. Бұл экспорт көлемінің азайтып, шетелден инвестиция тартуға басты кедергі.

Қор мәлімдемесінде инфрақұрылымдық жобалардағы кідірістер де басты тәуекелдердің бірі делінген. Егер жоспарланған жобалар уақытында іске аспаса, бұл жалпы ішкі өнімнің (ЖІӨ) өсуін баяулатуы мүмкін.

Сонымен қатар, ХВҚ өкілдері еліміздегі екінші деңгейлі банктерде тұтынушылық мақсаттағы несиелердің үлесі әлі де көп екенін айтқан. Осыған байланысты ХВҚ макропруденциалдық саясатты күшейтуді қолдайтынын мәлімдеді. Қаржы ұйымдары тарапынан қарыз берудегі бақылау күшейсе, банктердің тұрақтылығы артады деген ұстанымда сарапшылар.

Айта кетейік, 2025 жылғы 15-23 мамыр аралығында Али Аль-Иид мырза бастаған Халықаралық валюта қорының (ХВҚ) миссиясы ағымдағы экономикалық және қаржылық жағдайды, экономикалық даму перспективаларын, сондай-ақ елдің экономикалық саясаты мен басым реформаларын талқылау үшін Қазақстанға арнайы келген болатын.