Биыл — Қазақстан Конституциясына 30 жыл. Осы үш онжылдықта Конституциямыз Тәуелсіз Қазақстанның тірегі ғана емес, мемлекет пен азаматтың арасындағы сенімнің де негізіне айналды. Дәл осы мерейлі дата қарсаңында Конституциялық Сот пен «Бас редакторлар клубы» өзара түсіністік туралы меморандумға қол қойды.

Конституциялық Сот Төрағасының орынбасары Бақыт Нұрмұханов бұл келісім азаматтардың құқықтық мәдениетін көтеруге, Конституция нормаларын кеңінен түсіндіруге бағытталғанын атап өтті.

Жариялылық пен ашықтық қағидаттары конституциялық бақылау органдары қызметінің ажырамас бөлігі болып табылады. Біз негізгі халықаралық органдардың ұсынымдарын қоса алғанда, жалпыға бірдей стандарттарды дәйекті түрде ұстанамыз, — деді.

Ал Бас редакторлар клубының президенті, Сенат депутаты Бибігүл Жексембай БАҚ-тың конституциялық бақылау органымен бірлесіп жұмыс істеуі — сөз бостандығы мен қоғамдық ашықтықтың айғағы екенін айтты. Оның айтуынша, Клуб құрамындағы 300-ге жуық медиа менеджердің басым бөлігі өңірлерде еңбек етеді. Бұл — ақпараттың шалғай ауылға дейін жетуіне жол ашатын маңызды фактор.

Жиынға еліміздің жетекші БАҚ өкілдері мен «Хабар» арнасы, «Абай» телеарнасы, «Қазақ газеттері» мен Qazcontent сынды ірі медиахолдингтердің басшылары да осы бастамаға үн қосты. Олар ақпаратты таратуда Конституциялық нормаларды түсіндіру, азаматтық жауапкершілікті арттыру, құқықтық мәдениетті қалыптастырудың маңызын атап өтті.

Осылайша, Конституцияның 30 жылдығына арналған «Ата Заң – Тәуелсіздік тірегі» ұлттық жоспары аясында тағы бір ауқымды іс қолға алынды.

Негізі Конституциялық құндылықтар туралы тек қана заң тілінде емес, қарапайым халыққа түсінікті тілмен жазғанда ғана нәтижелі болмақ. Бүгінгі келісім соның көрінісі деуге болады.