Мектеп директоры мен бес педагог жұмыстан шығарылды .

Түркістан облысында қайтыс болған 12 жасар оқушының өлімі бойынша қылмыстық іс тоқтатылды. Бұл туралы Түркістан облыстық Полиция департаментінің баспасөз қызметі мәлім етті, деп хабарлайды inbusiness.kz сайты.

Департамент биылғы 7 ақпанда Қазығұрт ауданында оқушының қайтыс болу фактісі бойынша Қылмыстық Кодекстің 141-бабы 2-бөлігі бойынша (Балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау) қылмыстық іс қозғалғанын хабарлады.

"Тергеу барысында оқушының қайтыс болуы денсаулық жағдайының күрт нашарлауына байланысты болғандығы анықталды. Ол медициналық мекемеге барар жолда көз жұмды. Тергеу аясында куәлардан, оқытушылардан жауаптар алынды. Жәбірленушілердің барлық дәлелдері мен алынған бейнежазбалар зерттелді, бірқатар қажетті сараптамалар тағайындалды. Сот-медициналық сараптаманың қорытындысына сәйкес жәбірленушінің өлімі тыныс алу жолдарының жабылып, тілдің көмейге түсуінен туындаған асфиксия салдарынан болған", — делінген полиция таратқан мәліметте.

Облыстық ПД баланың денесінен зорлық-зомбылық, ұрып-соғу, тұншығу белгілері табылмағанын жазды.

"Тергеу нәтижесі бойынша өлімнің қылмыстық сипаты анықталмады және қылмыстық құқық бұзушылық құрамының болмауына байланысты қылмыстық іс тоқтатылды. Тоқтату туралы бекітілген қаулыны прокурор тексеріп, қабылданған шешімнің заңдылығын қарап шықты", — деп хабарлады ПД баспасөз қызметі.

Қайғылы оқиғадан соң мектеп директоры мен бес педагог жұмыстан шығарылғаны белгілі болды.

Бұған дейін Түркістанда 12 жастағы бала сыныптасын мектепте қылқындырып өлтіргені туралы ақпарат тараған болатын.