Шерзат ісінде жәбірленуші тараптың адвокаты Мейірман Шекеев марқұмның әкесі, анасы мен әжесіне сұралатын өтемақының мөлшерін айтты.

Бұл туралы Caravan.kz медиа порталы хабарлайды.

Негізгі моральдық өтемақы Шынасыл Абзал мен Равиль Сакиевтен талап етілді.

Қылмыстық іс бойынша қаралып жатқан сот процесінде марқұм Шерзат Полаттың туыстары айыпталушылардан өтемақы өндіріп алуды сұрады. Бұл жөнінде марқұмның туыстарының мүддесін қорғайтын адвокат Шекеев мәлімдеді.

Адвокаттың айтуынша, бірінші кезекте ⁠Шынасыл Абзалдан Шерзат Полаттың жерлеу рәсіміне жұмсалған шығынды өтеу үшін 2 794 000 теңге өндірілген.

Сонымен қатар, марқұмның әкесі Қаржаубай Нұрымовтың пайдасына Шынасыл Абзал мен Равиль Сәкиевтен моральдық зиянның өтемақысы ретінде 100 миллион теңге (әрқайсысынан 50 миллионнан) талап етіліп отыр. Дәл осындай сома марқұмның анасы Бейшембиева Гүлбара мен әжесі Қадырова Жұмабикенің пайдасына да өндірілмек.

Адвокат Шекеевтің айтуынша, қалған алты айыпталушы – Белқожаев Шыңғыс, Әскентай Дархан, Ильясов Нұрқияс, Тоқтаубаев Азамат, Тоқтаубаев Нұрболат және Қалиахмет Дидар — марқұмның туыстарына жеке-жеке 20 миллион теңгеден, жалпы 120 миллион теңге көлемінде өтемақы төлеуі тиіс.

Бұл тұлғалардан Бейшембиева Гүлбара мен әжесі Қадырова Жұмабикенің пайдасына да 20 миллион теңгеден өтемақы сұралды.

«Психологиялық зерттеу қорытындысына сәйкес, отбасына келтірілген моральдық зиян өте ауыр. Осыған байланысты біз өтемақы сомасын нақтылап отырмыз,» – деді адвокат Шекеев.

Айта кетейік, жерлеу рәсіміне жұмсалған қаржының түбіртектері сотқа қосымша ретінде тіркелген.