Бүгін, 2025 жылғы 29 мамырда, жеке тұлғаның қолынан тәркіленген сақ дәуіріне жататын бірегей тарихи зергерлік бұйымдар Қазақстан Республикасының Ұлттық музейіне тапсырылды, деп хабарлайды Zakon.kz.

Бұл жұмыс Бас прокуратура жанындағы Елден заңсыз шығарылған активтерді қайтару жөніндегі комитетпен жүргізілді. Кейінірек бұл артефактілер "Қайтарылған активтерді басқару компаниясы" ЖШС-не тапсырылды.

"Музей мамандарының қорытындысы бойынша, бұл артефактілер жоғары тарихи-мәдени маңызға ие, ерте темір дәуірі мен ортағасырлық кезеңді бейнелейді. Сараптамалық қорытындыға сәйкес, бұл бұйымдар б.з.д. VII ғасырдан бастап б.з. III ғасырына дейінгі кезеңге жатады және ежелгі көшпелі халықтардың мәдениетіне тән атақты скифтердің "аң стилінде" жасалған. Осыған байланысты Қазақстан Республикасының заңнамасы мен белгіленген тәртіпке сәйкес, Қаржы министрлігіне қарасты Мемлекеттік мүлік және жекешелендіру комитеті бұл заттарды Ұлттық музей мұрасының қорына беру туралы шешім қабылдады", – деді "Қайтарылған активтерді басқару компаниясы" ЖШС бас директоры Қуанышбек Мұқаш.

Тапсырылған бұйымдардың арасында: бүркіт басы бейнеленген металл бұйым; араб жазуы бар сақина; мүйізді жануар бейнеленген төбелі тік төртбұрышты пластина; жануарлардың мүсіндік бейнелері – қанатты арыстан, қанатты жылқы, қозғалыстағы барыс, секіріп тұрған бұғы; жазулары өшкен 15 көне тиын; екі шиыршық түріндегі сақина; арыстан басы бейнеленген жүзік бар. Барлық бұйымдардың жалпы салмағы 118 грамнан асады.

Елден заңсыз шығарылған активтерді қайтару комитеті аппаратының басшысы Мұрат Төлегенов қазіргі таңда 1 трлн теңгеден астам сомаға активтерді қайтару шаралары қабылданғанын, оның ішінде 750 млрд теңге активтер мен қаржы ретінде елге қайтарылғанын атап өтті.

"Нақтырақ айтсақ, оның ішінде 649 млрд – қаржы түрінде, ал 103 млрд теңге түрлі активтер түрінде қайтарылды. Бұл артефактілер – сақ дәуіріне жататын тарихи бұйымдар, олар мемлекет кірісіне біздің тізімдегі субъектінің бірінен мәжбүрлі түрде қайтарылды. Олардың жеке коллекцияға қалай түскені туралы нақты айта алмаймын, бұл мәселе тергелген жоқ, біз білмейміз. Олар ұрпақтан ұрпаққа сыйлық ретінде беріліп отырған деген болжам бар. Бағалау құнын сарапшылар анықтай алмады. Бірақ олардың тарихи маңызы өте жоғары болғандықтан, оларды Ұлттық музейге тапсыру жөнінде шешім қабылданды", – деді ол.

Бұған дейін Мария-Антуанеттаның қызғылт гауһар тасы аукционда 5 миллион долларға сатылмақ екенін жазған болатынбыз.