ҚР Еңбек және халықты әлеуметтік қорғау министрлігі қандас мәртебесін алғандар жайлы жаңартылған деректерді ұсынды, деп хабарлайды Zakon.kz.

29 мамырда таратылған ақпаратқа сүйенсек, 2025 жылы 4 427 этникалық қазақ тарихи отанымен табысып, қандас мәртебесін алды.

"Жалпы 1991 жылдан бері республикаға 1 млн 152 мыңнан астам этникалық қазақ оралды",- делінген ақпаратта.

Жыл басынан Қазақстанға келген қандастардың көпшілігі келесі елдерден келді.

• 45,8% – Қытайдан,
• 40,9% – Өзбекстаннан,
• 5,4% – Түрікменстаннан,
• 3% – Монғолиядан,
• 2,3% – Ресейден
• 2,6 – басқа елдерден.

2025 жылғы 1 мамырдағы жағдай бойынша еңбекке қабілетті жастағы этникалық қоныс аударушылар саны 59,7%-ды, еңбекке қабілетті жастан кіші 31,9%-ды және зейнеткерлер 8,4%-ды құрайды. Еңбекке қабілетті жастағы қандастардың ішінен білім деңгейі бойынша 17,4%-ы жоғары білімді, 26,8%-ы орта кәсіби білімді, 53,6%-ы жалпы орта білімді, және 2,2% білім жоқ.

Еңбек министрлігі қоныс аударған этникалық қазақтар республиканың түрлі өңірлеріне қоныстанғанын атап өтті. Сонымен бірге, қандастарды қоныстандыру үшін келесідей еңбек күші тапшы өңірлер анықталды:

• Ақмола,
• Абай,
• Қостанай,
• Павлодар,
• Атырау,
• Батыс,
• Шығыс Қазақстан,
• Солтүстік Қазақстан облысы.

Қоныстандыру өңірлерінде 2025 жылға арналған қандастарды қабылдау квотасы 2 309 адамды құрайды. 2025 жылғы 1 сәуірдегі жағдай бойынша қоныстандыру өңірлеріне 765 қандас қоныс аударды.

Ведомство жоғарыда аталған өңірлерде қоныстанған қандастарға көшуге субсидия түрінде мемлекеттік қолдау шаралары ұсынылатындығын айтты

• бір мезгілде отағасына және отбасының әрбір мүшесіне 70 АЕК (275,2 мың теңге) мөлшерінде;
• тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (59-дан 118 мың теңгеге дейін) мөлшерінде.

Таратылған ақпаратқа сүйенсек, жыл басынан бері 339 қандасқа түрлі қолдау шаралары көрсетілді. Атап айтқанда, 136 адам тұрақты жұмысқа орналастырылды.

Сонымен қатар, министрлік ерікті қоныс аударудың тиімділігін арттыру мақсатында азаматтарды солтүстік өңірлерге қоныс аударуға қатысатын жұмыс берушілерді қолдау бойынша институционалдық шаралар қабылданғанын айтты.

Тұрғын үй сатып алу, салу үшін немесе ипотекалық тұрғын үй қарыздары бойынша бастапқы жарнаның бір бөлігін жабу үшін экономикалық ұтқырлық сертификаты тұрғын үй құнының 50%-ы немесе бір отбасына 4,56 млн теңгеге дейін мөлшерінде біржолғы өтеусіз және қайтарымсыз негізде енгізілді.

Бұған дейін 189 қазақстандықтың "Болашақ" стипендиясының иегері атанғандығы хабарланған болатын.