Екібастұз қаласында "Қауіпсіз жол" жедел-алдын алу іс-шарасы аясында жол қозғалысы ережесін өрескел бұзған жүргізуші анықталды.

Chevrolet Nexia көлігінің иесі қарсы бағытқа арналған жолаққа шығып, апатты жағдай туындатқан. Бұл әрекеті үшін сот оны алты ай мерзімге көлік жүргізу құқығынан айырды.

Павлодар облыстық полиция департаментінің мәліметінше, жыл басынан бері өңірде қарсы қозғалыс жолағына шығуға байланысты 102 құқық бұзушылық тіркелген.

Жалпы, "Қауіпсіз жол" іс-шарасы барысында 7 мыңнан астам жол қозғалысы ережесін бұзу дерегі анықталды.

Атап айтқанда: 1708 жаяу жүргінші жолды белгіленбеген жерден өткені үшін; 1466 жүргізуші қауіпсіздік белдігін тақпағаны үшін; 578 адам маневр жасау ережелерін бұзғаны үшін; 177 жүргізуші мас күйінде көлік басқарғаны үшін жауапқа тартылды.

Сонымен қатар 30 көлік жүргізушісі жолдың қарсы жолағына шыққаны үшін жазаланып, 338 автокөлік арнайы айып тұрағына қойылды.

125 көлік мемлекеттік тіркеу нөмірлері тәркіленді. Полиция департаменті жүргізушілерді жолда барынша сақ болуға, қозғалыс ережелерін қатаң сақтауға және өз өмірлерімен қатар өзгелердің қауіпсіздігіне де жауапкершілікпен қарауға шақырады.