Астана халықаралық форумы – жаһандық деңгейдегі көпжақты диалогты дамытуға арналған халықаралық алаң. Мәжіліс депутаты Еділ Жаңбыршин форумның Қазақстан үшін қандай маңызға ие екенін айтты, деп хабарлайды El.kz интернет порталы.

Кез келген форумдағы негізгі бағыт – елімізге инвестиция тарту. Әсіресе біздің логистикалық бағыттағы ресурстарымыз бен ІТ саласы, жаңа кадрлар дайындау мәселесі талқыланады. Бүгінгі форумда сыртқы саясат, энергетика, климат мәселесі мен экономика тақырыбына назар аударылады. Әлемдегі трендтерге байланысты тақырыптар өзгеріп отырады. Сондықтан өткен форумдардың нәтижесі бар екенін білеміз. Себебі елімізге технология саласында инвесторлар келіп, жаңа жобалар іске асып жатыр. Қазір бізде мұнай химия, газ химия саласы қарқынды дамып жатыр. Солардың көпшілігі өткен форумдардың нәтижелері деп айтуға болады. Себебі форум өткеннен кейін бірден жобалар іске асып кетпейді. Оның келісімі бар, зерттеуі бар. Сондықтан болашақта осындай форумдарда талқыланған мәселелер жоғары нәтиже беруі мүмкін, — дейді Еділ Жаңбыршин.

Мәжілісмен еліміздегі сирек кездесетін металдарды игеру қажет екенін атап өтті.

Әлемдік тәжірибені білуіміз керек. Экономикалық әлеуетіміз жоғары. Бізде көптеген қазба байлық бар, оның бәрін өңдеу қажет. Қазір әлемде сирек кездесетін металдарға байланысты үлкен талас-тартыс болып жатыр. Ал Қазақстанда оның үлкен қоры бар. Сондықтан бұл қорларды тиімді игеріп, мемлекет мүддесін сақтап, өзімізді жаңа бағытта дамытуымыз керек. Мұнай мен газдың заманы өтіп бара жатыр. Біздегі екінші байлықтың көзі – сирек кездесетін металдар. Сондықтан осы металдарды өңдеу, инвестиция тарту күн тәртібіндегі өзекті мәселе болып тұр, — дейді Мәжіліс депутаты.

Айта кетейік, форумның басты миссиясы – халықаралық ынтымақтастықты нығайту, өзара түсіністік пен сенімді арттыру арқылы жаһандық мәселелерге шешім табу.

Форумға 100-ден астам елден 5 000-нан астам делегат қатысып жатыр, олардың қатарында мемлекет басшылары, үкімет өкілдері, халықаралық ұйымдар, бизнес және академиялық қауымдастық өкілдері бар.