Астанада Қазақстан мен Ресей арасындағы тарихи және мәдени байланыстардың, одақтастық пен тату көршіліктің рәмізі ретінде Мәңгілік достық аллеясының салтанатты ашылу рәсімі өтті.

Жаңа мәдени нысан – екі ел арасындағы көпжылдық ынтымақтастық пен сенімнің, сондай-ақ екі ел басшылары арасындағы достық қарым-қатынас пен өзара құрметтің бір көрінісі іспеттес.

Аллеяның ашылу рәсіміне еліміздің Мәдениет және ақпарат министрі Аида Балаева мен Ресей Федерациясының Мәдениет министрі Ольга Любимова бастаған ресейлік делегация мен Астана қаласының әкімі Жеңіс Қасымбек қатысты.

Іс-шара барысында Аида Балаева екі ел арасындағы қарым-қатынаста мәдени ынтымақтастықтың орны ерекше екенін атап өтті. Оның айтуынша, қос тарап бірлескен көрмелер ұйым­дас­тырып, шығармашылық ұжым­дардың гастрольдерін, кинофестивальдер өткізіп жатыр. Одан бөлек, Мәдени-гума­нитарлық ынтымақтастық жөніндегі кіші комиссия жемісті жұмыс істеп жатқанын да тілге тиек етті. Атап айтсақ, екі елдің мәдени күндері, Қазақстанда «Орыс маусымдары» мәдени-гуманитарлық жобасы және «Ауқымды гастрольдер» бағдарламасы сәтті жүзеге асып келеді.

«Мәдениет әрқашан халықтарды жақындастыратын көпір болып келеді. Өнер, тіл, дәстүр мен музыка арқылы біз бір-бірі­мізді тереңірек танимыз, ерек­ше­лі­гі­мізді түсінуге әрі құрметтеуге үйре­неміз, ортақ құндылықтарды табамыз. Сондық­тан да Мәңгілік достық аллеясы – халық­тарымыздың рухани бірлігінің, ортақ тарих пен келешекке бағытталған ынты­мақ­тастықтың айқын белгісі. Бұл орын бо­лашақта бірлескен мәдени жобалар жүзеге асатын, суретшілер, музыканттар, актёр­лер, тарихшылар мен жас таланттар бас қо­сатын алаңға айналарына сенемін. Аллея – ұрпақтан-ұрпаққа жалғасар сенім мен құр­мет, ортақ құндылықтарды сақтау қажет­тігін еске салып тұратын рәміз», деді А.Балаева.

Ресей Мәдениет министрі Ольга Любимова екі ел арасындағы мәдени бай­ла­н­ыстарды нығайтуға ниетті екенін айтты.

«Достық аллеясын ашу құрметі екі елдің Мәдениет министрлігіне беріліп отыр. Мәдени байланыстар, ортақ құндылықтар мен тарих халықтар достығының берік тірегі екені сөзсіз», деп атап өтті О.Любимова.

Аллеяда 200-ден аса емен ағашы мен 50 мыңнан аса көпжылдық сәндік бұта бар. Сондай-ақ екі ел арасындағы мәдени-гуманитарлық байланыстарды нығайтуға арналған іс-шаралар аясында «Мәдени диалог: Қазақстан – Ресей» атты дөңгелек үстел өтті. Алқалы жиынға қос елдің шығармашылық және ғылыми зия­лы қауымы қатысты. Жиын барысында театр өнері, музей ісі, кітапхана саласы, кинематография және мәдени білім беру бағыттарындағы бірлескен жобаларды дамыту келешегі талқыланды.

Еліміздің Мәдениет және ақпарат министрі бүгінде Мәдениет күндерін өткізуге дайындық жұмыстары жүріп жатқанын атап өтті.

«Аталған іс-шаралар аясында Ә.Қастеев атындағы Ұлттық өнер музейі­нің жауһар туындыларын ұсынатын көрме өткізу, отандық балет шеберлерін шақыру және Қазақ киносының күндерін ұйымдастыру жоспарланып отыр. Бұл іс-шаралар Ресей­дің жетекші сахналарында – соның ішінде Үлкен театрда, Вахтангов театрын­да және өзге де беделді мәдениет ошақтарында өткізіледі деп үміттенеміз. Бұл оқиғалар халықтарымыз арасындағы дос­тық пен өзара түсіністіктің жарқын бел­гісіне айналады деп сенеміз», деді министр.

Осы орайда Ресей Мәдениет министрі Ольга Любимова әр елдің мәдени құнды­лықтары өзіндік маңызға ие екенін айтты.

«Ресейді және Қазақстанды ортақ тарих, дәстүрлер және жай ғана жылы адами қатынастар байланыстырады. Дәл осы жайт екі ел арасындағы, соның ішінде мәдени ынтымақтастықтың да одан әрі дамуына қолайлы жағдай жасайды. Бұл ынтымақтастықтың негізінде әрқашан бір-бірінің мүдделеріне құрметпен қарау жатады», деді ол.

Жиын барысында екі елдің мәдени сала­дағы өкілдері баяндама оқыды. Сон­дай-ақ екі ел министрлері түркі тайпа­­лары­ның материалдық және рухани мәде­ниеті ұсы­нылған көрмені тамашалады. Қола дәуі­рінен орта ғасырға дейінгі кезеңді қамти­тын зергерлік өнердің озық үлгілеріне куә болды.

Аталған мәдени іс-шаралар екі ел өнерпаздары қойған музыкалық кешпен түйінделді. «Астана Опера» сахнасында Қазақстан мен Ресейдің мәдениет қайраткерлері, халықаралық байқаулардың лауреаттары, академиялық өнер жұлдыздары өнер көрсетті.