Берлинде Димаш Құдайбергенге арналған көрме өтіп жатыр. «JULDYZ» экспозициясы әншінің Еуропалық туры аясында «Erster Erster» галереясында ұсынылды. Онда Димаштың шығармашылық жолындағы маңызды сәттері мен өмірінде айрықша орын алған адамдардың бейнелері көрініс тапқан.

Портреттердің авторы — суретші Карин Бетц, оның жұмыстары қарындашпен және дәстүрлі майлы бояу арқылы орындалған. Қылқалам шеберінің айтуынша, Димаш бейбітшілік, білім беру және жас таланттарды қолдау мәселелеріне де атсалысып, Қазақстанды әлемдік аренада танытып келеді. Көрмеге кіру тегін, ал сатылған жұмыстардан түскен қаражаттың бір бөлігі қазақстандық қайырымдылық қорына бағытталады.

Карин Бетц, суретші:

- Бұл туындыларды жасағанда мені Димаштың шығармашылығы шабыттандырды. Әсіресе менің сүйікті әнім — «One Sky». Бұл әнде терең философиялық ой мен маңызды үндеу жатыр. Ол әлемдегі адамдардың бірлігі туралы. Димаштың ерекше өнері жердің түкпір-түкпіріндегі адамдар мен мәдениеттерді біріктіреді. Оның музыкасы — шын мәнінде әмбебап тіл.