Футболдан жастар құрамасының бапкері Елдос Ахметов ұлттық құраманың “Бельгияға” қарсы өткізген ойынына баға берді .

Бұл туралы Caravan.kz медиа порталы хабарлайды.

Fonteam YouTube арнасының сарапшысы Елдос Ахметов тең нәтижемен аяқталған ойында Еркін Тапаловтың еңбегі орасан зор екенін айтты.

”Самородовтың төмен ойнағаны бәріңізге тосын сый болған шығар. Ол 8-дік нөмірінде ойнады. Төрт шабуылшымен ойнадық. Олар — Сәтпаев, Чесноков, Кенжебек, Самородов. Енді ең қызығы, 6-шы нөмірдегі Тапаловтың тазалық секторы болуы. Қара жұмыстың бәрін Тапалов істеді. Кішігірім құпияны аша кетейін, Маруаұлымен осыдан он шақты күн бұрын сөйлескен кезде Тапаловты сол позицияға қоятынын айтқан. Тапаловтың сол жерде ойнап, қара жұмысты істей алатынына, Қуатты жоқтатпайтын ойыншы керек болды. Соның арқасында Рамазан Оразов та өзін жақсы сезінді. Рамазан артқа көп қайтпай, алдағы шабуылға көп араласты. Самородов төрт қорғаушының астынан тығылып шыққан сәттер көп болды. Сонымен қатар, еркіндікте жүрген біздің жартылай қорғаушыларамыз да, Кенжебектің ашылып жатқанының себепкері — Самородовтың артық ойыншыны тартып алып кетуі”, — дейді ол.

Сондай-ақ, Елдос Ахметов Дастан Сәтпаевтың жарақаты бар екенін де растады.

”Дастан 90 минут бойы да ойнай алар еді. Бірақ оның жарақаты бар. Екеуміз ойыннан кейін сөйлестік. Мен қуанып, оны құттықтап хабарлама жазып жібердім. Ол маған бірден хабарласты. “Қуанышұлы, құттықтағаныңызға көп рақмет. Мен 90 минут ойнағым келді. Бірақ, өкінішке қарай, жарақатым ойнатқызбады” деді. Ол ойыннан кейін бірден ем алуға кетті”, — дейді ол.

Қазақстан ұлттық құрамасының медиа офицері Әлімжан Асқар шабуылшы Ғалымжан Кенжебектің де ойын алдында сырқаттанып қалғанын айтты.

”Жағдайды біліп, бас бапкерден сұрадық. 50-ші минутта Дастанның белі ұстап қалып, ойынды жалғастыру қиын болып оны ауыстырды. Кенжебекке тағы да ойнауға мүмкіндік берер еді. Бірақ ойын алдында тұмауратып қалған. Вирус жұқтырған. Сондықтан 90 минут ойнауға шамасы жетпеді. Үзілістің кезінде жағдайы қиындап бара жатқанын айтып, ауыстыруды өтініпті. Одан “1 сағат ойнауға дайынсың ба” деп сұраған. Ол дайын екенін айтқаннан кейін, екінші таймға шыққан. Бірақ матчтан кейін әлсіреп қалған. Сол себепті оған ерте кетуге мүмкіндік берді”, — дейді ол.

Еске сала кетейік, 15 қарашада футболдан Қазақстан ұлттық құрамасы 2026 жылғы әлем чемпионатының іріктеуі аясында “Астана Аренада” Бельгияны қабылдады.

Ойын жоғары қарқында басталып, 9-минутта Дастан Сатпаев қақпашыны жақын бұрышқа дәл бағытталған соққымен қапыда қалдырды.

Екінші тайм басталысымен-ақ бельгиялықтар есепті теңестірді. 48-минутта Ханс Ванакен айып алаңындағы шабуылды нәтижелі аяқтап, есепті 1:1-ге жеткізді.

Матчтың аяқталуына он минут қалғанда Ислам Чесноков ереже бұзғаны үшін алаңнан қуылды. Матч тең есеппен аяқталды (1:1).