Астанада жастардың еңбек маусымы ашылды, деп хабарлайды 24KZ. Биыл «Жасыл ел» жасағына бес мыңнан астам елордалықты жұмысқа алу жоспарланған. Олардың дені оқушылар мен студенттер. Сонымен қатар көп балалы отбасылардан шыққан балалар мен әлеуметтік аз қамтылған отбасыларға басымдық беріледі.

Астанада «Студенттік құрылыс және «Жасыл ел» жастар еңбек жасақтарының 21 еңбек маусымы басталды. Мұнда 14 және 35 жас аралығындағы кез келген жас жұмыс істей алады. Солардың бірі – 11-сынып оқушысы Жансезім Камбар. Ол жаз бойы қоғамға пайдалы жұмыспен айналысатынына сенімді.

Жансезім Камбар, «Жасыл ел» жастар еңбек жасағының жауынгері:

- Біз осы жұмыс істеу барысында көптеген жауапкершілікке міндеттелеміз. Көгалдарды суару арқылы өзіміз қалай тамақтанамыз, сол сияқты ағаштарға да, көгалдарға да қараймыз. Себебі табиғаттың аясында жұмыс істеу өте маңызды және біз сол арқылы қаржы табамыз. Біз әр ағаштың суарылуын міндетті түрде қадағалаймыз.

Биыл «Жасыл ел» жасағына 5200 адамды жұмысқа алу жоспарланған. Жобаға қатысатын барлық жас жалақымен және арнайы құрал-жабдықтармен қамтамасыз етіледі.

Ерлан Айдар, Астана қаласы жастар саясаты мәселелері басқармасының өкілі:

- Ең бірінші кезекте біз әлеуметтік осал топтағы отбасылардың балаларына және аз қамтылған, көпбалалы отбасылардың балаларына үлкен назарымызды қойып отырмыз. Кәмелеттік жасқа толмаған балалар күніне 4 сағат, аптасына 5 рет Еңбек кодексіне сәйкес, денсаулығына зиян келтірмейтін жұмысты атқарады.

Ал оқушылар мектеп аумағын, кәмелет жастан асқан азаматтар қаладағы саябақтар мен гүлзарларды абаттандыруға атсалысады. Жалпы жазғы еңбек маусымы төрт айға жоспарланған.

Авторлары: Серік Селеубайұлы, Мерей Талап