2025 жылғы 28 мамырда "Самұрық-Қазына" ұлттық әл-ауқат қоры" АҚ басқарма төрағасы Нұрлан Жақыпов Ақордада өткен жиында Қазақстан Руандадан бериллийді не үшін сатып алатынын түсіндіріп берді, деп хабарлайды Zakon.kz тілшісі.

Спикердің айтуынша, Руанда президентінің Қазақстанға жасаған ресми сапары аясында "Самұрық-Қазына" мен Руанданың Тау-кен, мұнай және газ басқармасы (Rwanda Mines, Petroleum and Gas Board) арасында әріптестік туралы келісімге қол қойылады.

"Бұл – Руанданың минералдық-шикізат кешенін дамыту және пайдалану үшін жауапты мемлекеттік орган. Руанда – Шығыс Африкада орналасқан, табиғи ресурстарға бай ел. Салыстырмалы түрде шағын ел, бірақ бериллийдің айтарлықтай ресурстары бар. Үлбі металлургия зауытына (ҮМЗ) иелік ететін "Қазатомөнеркәсіп" еншілес компаниясы бериллийді Руандадан Қазақстанға жеткізуді қарастыруға ниетті", – деп толықтырды Нұрлан Жақыпов.

Оның айтуынша, ҮМЗ металл бериллиін өндіретін бірегей технологияға ие. Яғни, бериллий концентратынан нақты сипаттамалары бар металл алынатын болады.

"Бериллий – телекоммуникация саласында, жартылай өткізгіштерде, аэроғарыш және қорғаныс өнеркәсібінде қолданылатын маңызды минералдардың бірі. Бұл келісім экономикалық қана емес, саяси қарым-қатынастарды да нығайтады. ҮМЗ жылына 8% бериллий тотығы бар шамамен 1500 тонна концентратты өңдей алады", – деді ол.

Руандадан жеткізілетін нақты көлем туралы сұраққа Жақыпов: бұл – коммерциялық сипаттағы және келіссөздің бастапқы кезеңінде тұрған мәселе болғандықтан, тар шеңберде талқыланатынын айтты. Сонымен қатар, ол алғашқы жеткізілімдер биыл басталуы мүмкін екенін де жеткізді.

"Руандадан бериллий концентраты, яғни соңғы металлға дейін өңделетін шикізат сатып алынатын болады", – деп түйіндеді "Самұрық-Қазына" басшысы.

Бұған дейін Қазақстан мен Руанда сауда және ақпараттық технологиялар саласындағы әріптестікті дамытуға келіскен болатын.