3,7 млрд теңге залал келтірген шенеунік ұсталды .

Жүк көліктерін заңсыз тіркеумен айналысқан ұйымдасқан қылмыстық топтың мүшесі Ресей Федерациясынан Қазақстанға экстрадицияланды, деп хабарлайды Бас прокуратура.

Тергеу мәліметінше, күдікті — "Азаматтарға арналған үкімет" мемлекеттік корпорациясының маманы болған. Ол 2022–2023 жылдары қылмыстық топ құрамында автокөлік иелерін тауып, алғашқы тіркеу алымдарына қатысты жалған төлем деректерін ақпараттық жүйеге енгізіп, көліктерді заңсыз тіркеген. Нәтижесінде 481 автокөлік заңсыз есепке қойылып, мемлекетке 3,7 млрд теңге көлемінде ірі залал келтірілген.

Қылмыстан кейін күдікті шетелге қашып, халықаралық іздеуге жарияланған. Биыл наурыз айында ол Мәскеу облысында ұсталып, Қазақстан Бас прокуратурасының сұрауы бойынша елге қайтарылды.

Қазіргі уақытта күдікті тергеу изоляторына қамалды.

Оқи отырыңыз: Тоқаев Ресей президентімен телефон арқылы сөйлесті