Денсаулық сақтау қызметінің құны соңғы үш жылда 2,8 есеге өскен.

Мәжіліс депутаты Нұрлан Әуесбаев Денсаулық сақтау министріне жолдаған депутаттық сауалында МӘМС жүйесіндегі медициналық қызметтердің қолжетімділігін арттыру мәселесін көтерді, деп хабарлайды inbusiness.kz сайты.

"Міндетті әлеуметтік медициналық сақтандыру жүйесі шындығында халыққа медициналық көмектің қолжетімділігі мен оның сапасын жақсарту мақсатында енгізілгені белгілі. Десе де, денсаулық сақтау қызметінің құны соңғы үш жылда 2,8 есеге өскен. Ал азаматтардың ай сайынғы тұрақты жарналарына қарамастан, медициналық қызметтердің сапасы мен оған қолжетімділік 47%-ға дейін төмендеп кеткен. Қазақстандықтардың наразылығын тудыратын негізгі мәселелердің бірі – МӘМС пакетіне кіретін қызметтер, оның ішінде дәрігерлік кеңестер, консультациялық-диагностикалық қызметтер қолдан, жасанды жолмен қиындатылып, тіпті шектелуде", – деді депутат.

Нұрлан Әуесбаевтың сөзінше, ПЦР, ИФА, КТ және МРТ сынды тексерулерді жасату үшін тұрғындар апталап, кейде бірнеше ай бойы кезек күтуге мәжбүр. Ол мұндай күрделі диагноздардың нәтижесі 10 күннен артыққа жарамайтынын айтып отыр.

"Мамандарға жазылу мүмкін емес, бірақ олардың жұмыс кестесінде бос уақыт көп" дейді шағымданушылар. Бұл олқылық неге жүйеленбей келеді? Консультативтік-диагностикалық қызметтерге қолжетімділікті жүйелі шектеу медициналық қызметтердің сапасының төмендеуіне ықпал етері анық. Аса күрделі және жұқпалы аурулардың кеш диагностикалық анықталуы өмірге аса қауіпті екені айтпаса да түсінікті. Бұл міндетті медициналық сақтандыру жүйесінің беделін тіпті түсіру ғажап емес", – деп атап өтті депутат.

Мәжіліс депутаты осыған байланысты бірқатар ұсыныс тастады:

– "Бүгін және қазір" қағидатына сай қолжетімділікті қамтамасыз ету үшін көрсетілген қызметтерге негізделген төлемге көшуді қамтамасыз ету;

– Медициналық ұйымдардың кредиторлық берешегін өтеуді толық және уақтылы қаржыландыруды қамтамасыз ету;

– Саланы цифрландыруды және барлық медициналық ақпараттық жүйелерді интеграциялауды күшейту;

– Егер тағайындалған клиникада тиісті қызмет 10 күнтізбелік күн ішінде көрсетпесе, кешенді медициналық көмек көрсетуді басқа медициналық ұйымға еш кедергісіз ауыстыру.

Сонымен қатар егер пациент мемлекеттік клиникада қызмет ала алмаған жағдайда жеке клиникада емделуге жіберу мүмкіндігін қарастыру да ұсынылды.