Кеше кешкісін АҚШ-тың қаржы министрлігі Ресейдің "Роснефть" пен "Лукойл" компанияларына және оларға еншілес кәсіпорындарға санкция салды.

Олар мұндай шектеуді Ресей тарапының бейбіт келісім жасауға ниеті жоқ екендігімен байланыстырады, деп хабарлайды inbusiness.kz сайты.

АҚШ қаржы министрі Скотт Бессент Дональд Трамптың соғысты тоқтатуға қатысты іс-әрекетін әркез қолдап, қажетті қадамдарды қабылдауға дайын. Ол өз кезегінде одақтастарын да осы санкцияны қолдауға үндеді.

Трамптың сөзінше, Вашингтон Мәскеудің жауабын тым көп күткен. Солай бола тұра, Америка көшбасшысы Ресей мен Украина арасындағы жанжалдың тезірек аяқталып, бейбітшілік орнағанын қалайды және үміттенеді.

Бір жеті бұрын, яғни 15 қазанда Ұлыбритания да "Роснефть" пен "Лукойл" компанияларына санкция салған болатын.

Айта кетейік, "Лукойл" – Қазақстандағы бірнеше жобада үлкен үлеске ие компания. Ол 2 жыл бұрын "ҚазМұнайГаздан" Каламқас-теңіз бен Хазар кен орындарының 50% үлесін $200 миллионға сатып алған.

Ал 2015-2020 жылдары "Лукойл" Маңғыстау мен Қызылорда облыстарындағы кейбір активін сатқан еді.

Бұған дейін АҚШ пен Ресей саммиті кейінге шегерілгенін жаздық.