Өйткені, клуб басшылығы бұған қатысты ішкі жаңа тәртіп енгізіп отыр.

"Қайраттың" президенті Қайрат Боранбаев қақпашыларға берілген қымбат сыйлықтан соң клуб ішінде арнайы түсіндіру жұмыстары жүргізген, деп хабарлайды inbusiness.kz сайты.

"Спорт Шрёдингера" басылымының жазуынша, клуб иесі "жеңіс – команданың ортақ еңбегі" деп есептейді.

Еске салайық, 18 жастағы қақпашы Шерхан Қалмырзаның есімі Чемпиондар лигасындағы "Спортингпен" және "Реалмен" өткен ойындардан кейін қатты танылып, әлеуметтік желідегі оқырмандары күрт артқан еді.

Сол себепті, оған кәсіпкер Exceed маркалы көлік сыйлады. Артынша "Қайраттың" екінші нөмірлі қақпашысы Темірлан Анарбековке де кәсіпкерлер көлік мінгізді.

Бұл жайт қоғамды қақ бөлді. Бірі сыйлық берілгені дұрыс деп тапса, кейбірі командалық ойында бөле жарып, сыйлық беру клубтың қарым-қатынасына өз кедергісін келтіретінін айтты. Тіпті, бас бапкер Рафаэль Уразбахтин де мұндай жекелей марапаттау командалық рухқа кері әсер етуі мүмкін екенін жасырмады.

– Біз ойыншылармен кездесу өткізіп, осындай жағдайларда қалай әрекет ету керектігін түсіндірдік. Қай жағдайда да жеңіс – бүкіл команданың еңбегі. Егер бір ойыншыға сыйлық берілсе, онда Дастанға да, Мартыновичке де, Громыко мен Заруцкийге де лайық деуге болады. Бірақ болған іс болды. Әрине, біз мұндай сыйлықтарды тыйым сала алмаймыз. Дегенмен, футболшылардың бәрі клубпен келісімшартқа отырғандықтан, енді барлық осындай мәселе клуб арқылы реттелуі тиіс деген шешім қабылдадық, – деді Қайрат Боранбаев.

Осылайша, "Қайрат" басшылығы алдағы уақытта ойыншыларға жеке сыйлық немесе демеушілік сый тарту мәселесін клубтың уысында ұстайды.