2025 жылғы 27 мамырда Мәжіліс мінберінде ауыл шаруашылығы вице-министрі Бағлан Бекбауов шегірткеге қарсы егіс алқаптарын өңдеу қарқыны туралы пікір білдірді, деп хабарлайды Zakon.kz тілшісі.

Ол егіс алқаптарын өңдеу бойынша жоспарлы жұмыстар жылдың басынан бастап жүргізіліп жатқанын еске салды. Бағлан Бекбауовтың айтуынша, министрлік кестеден кешікпей жұмыс істеуде, себебі қажетті қаражат алдын ала бөлінген.

"Шегірткеге қатысты түрлі видеоматериалдар тарап жатыр. Солар бойынша жедел штаб жұмыс істеп жатыр. Министрдің өзі осы шегіртке мәселесіне байланысты іссапарға шықты. Қазіргі таңда бұл бағытқа барлық күш жұмылдырылып отыр. Нақтыланған жоспар бойынша егіс алқаптары, жолақтар және басқа да аймақтар өңделуде", – деді вице-министр.

Оның айтуынша, қазіргі кезде шегіртке қанаттанып, белсенді көшу фазасына өткен жоқ. Осы кезеңнен кейін шегірткелер үлкен қашықтықтарды еңсеріп, егістіктерге зор зиян келтіруі мүмкін. Сондықтан фермерлерге қауіп төнбей тұрып, яғни жәндіктер толық өсіп жетілмей тұрып, алқаптарды өңдеу өте маңызды.

Бұған дейін Ақтөбе облысындағы оңтүстік аудандарда шегіртке қаптағандығы жайлы жазған болатынбыз.