Отбасылық дәрігер Аслан Темірхан баласын ернінен сүйетіндер туралы сөз қозғады.

Оның ойынша баланы ерніне сүю дұрыс емес.

Бұл туралы ол «Нүкте» Youtube арнасына берген сұхбатында айтты, — деп хабарлайды Caravan.kz медиа порталы.

«Осыған байланысты әріптесіммен бірге дауласқанбыз. Баласының ернін сүйетін ата-аналардың бұл істері мүлдем дұрыс емес. Ата-аналар оны жаман болсын деп жасамайтынын білемін. Бірақ, балаларда бәрібір дұрыс емес ой қалыптасады. Балалар үшін бұл норма болып қалыптасуы мүмкін. Басқаларға тыйым саламыз, бірақ өзіміз сүйе береміз дегенді қою керек. Баланың өзінде де жеке шекара деген болады. Біз балалардың да жеке шекарасын құрметтей білуіміз керек», — деді дәрігер.

Дәрігер сондай-ақ ата-аналар балаларды сүймеген, иіскегенін айтты.

«Жаңа туған сәбиді 40 күніне дейін ешкім сүймеуі де, жақындамауы да керек. Тек ата-анасына ғана рұқсат. Біз медициналық университетте оқыған кезде, бізге «қазақтар балаларды сүймеген, иіскен» дегенді айтатын. Сондықтан балаларды, әсіресе жаңа туған сәбиді сүю дұрыс емес. Үлкен махаббаттарыңыз болса жай ғана иісеңіз, сүймеңіз», — деді дәрігер.