Жұмыс беруші еңбек шартының ережелеріне қандай да бір өзгеріс енгізе алмайды.

Сенат "Қазақстан Үкіметі мен Қатар Үкіметі арасындағы Қазақстан Республикасынан келген жұмыскерлерді Қатар Мемлекетінде жұмысқа орналастыруды реттеу туралы келісімді ратификациялау туралы" заңды мақұлдады, деп хабарлайды inbusiness.kz сайты.

Құжатты сенатор Руслан Рүстемов таныстырды.

2024 жылғы 14 ақпанда Мемлекет басшысының Қатарға сапары барысында Қазақстан Республикасынан келген жұмыскерлерді Қатар Мемлекетінде жұмысқа орналасуын реттеу туралы келісімге қол қойылды.

"Келісімнің мақсаты – Қазақстан азаматтарының Қатардағы құқықтық және әлеуметтік қорғалуын қамтамасыз ету. Келісімде екі елдің өтінімдер алмасуды, іріктеу процесін сүйемелдеуді және Келісімнің орындалуын бақылайтын уәкілетті органдары айқындалған. Қазақстан тарапынан Еңбек және халықты әлеуметтік қорғау министрлігі, Қатар тарапынан – Еңбек министрлігі. Қазақстан азаматын Қатар Мемлекетінде жұмысқа орналастыру рәсімі қатарлық жұмыс берушінің өтінім беруінен басталады. Онда біліктілік талаптары, еңбек жағдайлары, еңбек шартының ұзақтығы және басқа да мәліметтер көрсетіледі", – деді депутат.

Оның айтуынша, өтінімдерді жинағаннан кейін Қатар Мемлекетінің Еңбек министрлігі оларды Қазақстанға жібереді. Өтінімдерді алғаннан кейін қазақстандық тарап Қатарда жұмыс істеу үшін кандидаттарды жинай бастайды.

Ол үшін келесі айқын рәсімдер белгіленеді:

– халықты электронды еңбек биржасы арқылы хабардар ету,

– қазақстандық азаматтарды жұмысқа қабылдау және олардың Қатарда жұмысқа орналасу кезіндегі құқықтарын айқындау.

Қатар тарапының өтінімдері бойынша қатарлық жұмыс беруші мен қазақстандық жұмыскер арасында еңбек шарты жасалады. Шарт екі елдің министрліктері мен елшіліктерінде тіркеледі және оның мазмұны Қатар заңымен қатаң реттеледі. Үлгілік еңбек шарт Келісімге қоса беріледі және оның ажырамас бөлігі болып табылады.

Үлгілік еңбек шартында жұмыс беруші тарапынан қамтамасыз етілетін мынадай кепілдіктер көзделген:

– тұрғын үй немесе тұруға жәрдемақы беру;

– жұмыс орнына дейін және кері қайту үшін тегін көлік не көлік жәрдемақысын беру;

– Қатар заңнамасына сәйкес медициналық қызмет көрсету;

– жыл сайынғы демалысты қоса алғанда, жұмысқа орналасу және еңбек шартының аяқталуы кезінде Қазақстанға ұшуға ақы төлеу.

Сенатор жұмыс берушінің еңбек шартының ережелеріне қандай да бір өзгерістер енгізуге құқығы жоқ екенін айтты.